Дьокуускайдааҕы коммунальнай-тутуу техникумугар бэҕэһээ үөрэтэр-производственнай мастарыскыайы үөрүүлээх быһыыга-майгыга астылар.
Бу туһунан СИА техникум дириэктэрэ Светлана Калинина иһитиннэрдэ:
«Саҥа куорпуска «каменщиктар», «уустар» мастарыскыайдара итиэннэ тимир-бетон оҥоһуктарга (ЖБИ) үөрэтэр лаборатория бааллар. Манна устудьуоннар ылбыт билиилэрин чиҥэтэн үөрэх кэмигэр эбии дьарыктаныахтара. Ол аата, күн аайы ыытыллар занятиеҕа техникум 25 бөлөҕүн оҕолоро араспысаанньанан сылдьыахтара. Ону сэргэ манна куруһуоктар ыытыллыахтара», — диир дириэктэр.
Үөрүүлээх тэрээһиҥҥэ устудьуоннар тимири иһэрдэн уонна мастан чочуйбут миэбэллэрин, сибэккилэр иһиттэрин, мозаикаттан панноларын о.д.а. үлэлэрин быыстапкалаатылар. Ыҥырыылаах ыалдьыттар оҕолор үлэлэрин улаханнык хайҕаатылар, сэргээтилэр.
СӨ профессиональнай үөрэхтээһин уонна кадры аттаран туруорууга миниистир Михаил Присяжнай «Росинтехпроект» ХЭУо салайааччыта Андрей Игнатьев тэрилтэтэ мастарыскыайы кэмигэр бүтэрбитин, техникум дириэктэрин солбуйааччы Марина Фаркова уонна кэллэктиип саҥа тутуу үлэҕэ киирэригэр кыһамньытын уурбутун бэлиэтээтэ, махтал суруктары туттарда. Салгыы миниистири кытта «Эдэр профессионаллар» Уһук Илиннээҕи Федеральнай уокурук чемпионатын полуфиналыгар «Сухое строительство и штукатурные работы» хайысха кыайыылааҕа, техникум устудьуона Иван Григорьев уонна дириэктэр Светлана Калинина дохсун ытыс тыаһынан уонна айхалынан арыаллатан аалай кыһыл лиэнтэни быстылар. Үөрбүт-көппүт устудьуоннар саҥа дьиэҕэ өрө көтөҕүллэн үлэлиэх, үөрэниэх буолан эрэннэрдилэр.
This post was published on 18.05.2016 17:31 17:31