«Колмар» чоҕу таҥастыыр хампаанньа Уһук Илин региоҥҥа экологическай бырайыактары үлэлэтиигэр 2021 сылга диэри 6 млрд солк. көрөр былааннаах. Бу туһунан СИА ТАСС-ка олоҕуран иһитиннэрэр.
«Биһиги тулалыыр эйгэбит ыраас буоларын туһугар баар ньыманы барытын туттуохтаахпыт. Аҥардас экологияҕа 2021 сылга диэри 6 млрд солк. көрүллүө», — диир «Колмар Груп» дириэктэрдэр сэбиэттэрин бэрэссэдээтэлэ Анна Цивилева.
Хампаанньа экологияҕа куттал суох буолуутун үлэтин Нерюнгрига салгыы күүһүрдэр былааннаах. Манна чоҕу таҥастыыллар. Ууну ыраастыыр станциялары туруоруохтара, олохтоох экологическай бырайыактарга кыттыһыахтара. Маны сэргэ чоҕу тиэйиигэ-таһыыга сэрэҕи күүһүрдүөхтэрэ.
«Колмар» — «Соҕуруу Саха сирэ» инникилээн сайыннарар территория (ТОР) резиденинэн буолар. Нерюнгри оройуонугар Инаглинскай уонна Денисовскай хайаны байытар комплекстардаах. Хампаанньа саппааһыгар 1 млрд тахса туонна чохтоох.
