29 Кулун тутар 29.03
  • -10°
  • $ 92,26
  • 99,71

Кирилл Алексеев: "Сахамедиа" холдинг таһаарыыларын Саха сирин хас үһүс олохтооҕо ааҕар

17:45, 09 июня 2017
Текст:
Читайте нас на
Яндекс Новости
ЯДВ

Өрөспүүбүлүкэҕэ 960 тыһыынча кэриҥэ киһи олорор. «Сахамедиа» иһинэн тахсар судаарыстыбаннай СМИ-нэн 300 тыһыынча киһи хабыллар. Онон Саха сирин хас үһүс олохтооҕо холдинг таһаарыыларын кытта алтыһар. Бу туһунан акционернай уопсастыба генеральнай дириэктэрэ Кирилл Алексеев Уһук Илин регионнааҕы МедиаСаммит кэмигэр бэс ыйын 8 күнүгэр эттэ. 


Санатар эбит буоллахха, МедиаСаммит быйылгы үлэтин Владивостокка бэҕэһээ саҕалаабыта.

Кирилл Алексеев тыл эппит дискуссията хаһыаттар саҥалыы көстүүлэригэр, конвергентнай редакциялар үлэлэригэр уонна федеральнай таһаарыылар бастыҥ практикаларыгар ананна. Кини  СИА интернет-таһаарыы, «Якутия», «Саха сирэ» өрөспүүбүлүкэтээҕи хаһыаттар «Сахамедиа» састаабыгар киллэриллиэхтэриттэн, тэрилтэ элбэх хайысхалаах аныгы мультимедийнай холдинг быһыытынан билиннэ диэн эттэ.

Медиа-менеджер иһитиннэрбитинэн, судаарыстыбаннай СМИ-ны уларытан тутууга биир сүрүн хардыынан нууччалыы уонна сахалыы тылынан тахсар икки конвергентнай редакциялары тэрийии буолар. Редакциялар истэригэр бырайыак бөлөхтөрө тэриллэн, социальнай суолталаах былааннаах уонна ситимнээх тиэмэлэри сырдатыыга хайысха тутуһуллубута. «Сүрүн ыйытыы», «Киэҥ сир», «Өрөспүүбүлүкэ киэн туттуута», «Дьиэ кэргэн», «Талааннаах оҕолор» уонна да атын бырайыактар үлэлээн барбыттара.

«Хас биирдии бырайыак — толору сырдатар-иһитиннэрэр хампаанньа«, — бэлиэтээн эттэ Алексеев. Кини бу сыл тохсунньутуттан, төһө да итэҕэйбэт дьон баалларын үрдүнэн, «Якутия» уонна «Саха сирэ» судаарыстыбаннай хаһыаттары босхо тарҕатыы саҕаламмытын кэпсээтэ. Уопсай тираж 90 тыһ. экземплярга тириэрдиллибитэ. Билигин таһаарыылар өрөспүүбүлүкэ 400 нэһилиэнньэлээх пуунугар тарҕаналлар, ол аата Саха сирин бүттүүнүн кэриэтэ хабыллар.

Маны сэргэ, уопсастыба генеральнай дириэктэрэ эппитинэн, холдинг састаабыгар киирсэн, бэчээт таһаарыыларын базатыгар икки сайт үлэтин саҕалаата — соҕотох кэриэтэ сахалыы тылынан тахсар «Эдэр саас» уонна санаа атастаһыытыгар аналлаах GazetaYakutia.ru.

Кирилл Алексеев бэлиэтииринэн, холдинг СИА судаарыстыбаннай интернет-таһаарыыта федеральнай ханааллар цитаталыылларын кэтээн көрөр испииһэгэр 2016 сылга Уһук Илиҥҥи региоҥҥа ПримаМедиа, Sakh­alin.info, Gubernia.­com уонна Кам24 курдук бөдөҥ СМИ-лэри бэйэтин кэннигэр хаалларан, бастакы эрээккэ турар.

Салайааччы «Сахамедиаҕа» аныгылыы тутуулаах, бары өттүнэн толору хааччыллыылаах медиацентр баарын иһитиннэрдэ. Бу дьыалабыай, общественнай-политич­ескай тэрээһиннэри, пресс-конференциялары, төгүрүк остуоллары ыытарга табыгастаах былаһаакка буолбутун эттэ. Манна интернеккэ уонна өрөспүүбүлүкэтээҕи телевидениеҕа таһаарыллар видеобырагыраамалар устуллаллар.

«Биһиги биир кэлим ис хоһоонноох уонна административнай уларыта тутууну оҥордубут, судаарыстыбаннай СМИ-гэ саҥаттан көрүүнү киллэрдибит. Бу барыта биһиги инники күөҥҥэ тахсарбытыгар уонна күннэтэ холбоон 365 тыһыынча киһилээх аудиторияҕа тарҕанарбытыгар тириэртэ. Онон, Саха сирин хас биирдии үһүс олохтооҕо «Сахамедиа» таһаарыыларын кытта син-биир алтыһан ааһар«, — диэн түмүктээтэ ме­диа-менеджер.

Дискуссия кэмигэр Олег Шевцов («Мир Белого­рья»), Андрей Першин («Российск­ая газета» редакция), Виталий Лейбин («Русский ре­портер») эмиэ тыл эттилэр. Модераторынан «Российская газ­ета» Уһук Илиҥҥи филиалын дириэктэрэ Сергей Сайко үлэлээтэ.

МедиаСаммикка Уһук Илиҥҥи регион сүрүн медиахолбоһуктарын бэрэстэбиитэллэрэ уонна ыҥырыылаах экспердэр, омук сириттэн суруналыыстар делегациялара блогосфера, digital-маркетинг, фактчекинг,  стартаптарга аналлаах PR, социальнай медиа тиэмэлэригэр уонна да атын бу хайысха сайдыытыгар тирээн турар боппуруостарга ырытыылары оҥороллор.

Следите за самым важным и интересным в Telegram-канале и WhatsApp-группе ЯСИА