Олунньу 24-25 күннэригэр Киев куоракка Украина уһулуччулаах бөҕөстөрүн, тириэньэрдэрин бирииһигэр тустуу үс көрүҥэр үгэс буолбут норуоттар икки ардыларынааҕы турнир ыытылынна. Бу улахан түһүлгэҕэ саха тоҕус тустууга тиийэн, күүһүн холосто.


Күрэхтэһии бастакы күнүгэр 57 киилэҕэ диэри ыйааһыҥҥа Арассыыйа аатыттан дойду икки төгүллээх призера Арыйаан Тютрин, норуоттар икки ардыларынааҕы турнирдар призердара Федор Постников, Белоруссияттан аан дойду призера Владислав Андреев, Минскэйгэ ыытыллыбыт күрэхтэһии кыайыылааҕа Андрей Бекренев, Македонияттан Владимир Егоров туһуннулар. Тустууну сэҥээрээччилэр уолаттарбыт мэтээл ылаллар ини диэн эрэҥкэдийиилэрэ туолбата.

Андрей Бекренев Афган Хашаловка (Азербайджан) 2:3, Арыйаан Тютрин Джо Родригеска (АХШ) 2:2 ахсаанынан хоттортоотулар. Оттон Владислав Андреев Тарас Марковиһы 6:2, Владимир Егоров Ярослав Гурскайы 2:1 (иккиэн — Украинаттан), оттон Федор Постников Гиви Давидовы (Италия) (1:1) баһыйа тутаттаатылар.

Салгыы Андреев биир дойдулааҕын Владимир Егоровы кыайан баран, Георгий Эдирешашвилины (Азербайджан) утары тугу да оҥорбото —  0:10 ахсаанынан хоттордо. Федор Постников Джо Родригеһы сатаан ааспата. Андреев, Эдирешашвили финалга тахсыбытынан, салгыы Афган Хашаловы кытта туһунна эрээри, тулуспата (2:5). Бэлиэтээн эттэххэ, ыарахан эчэйии кэнниттэн Владислав Андреев бу  улахан күрэхтэһиигэ бастакы кыттыыта.

Иккис күн көбүөргэ 61 уонна 70 киилэҕэ диэри ыйааһыннарга дойду чөмпүйүөнэ Егор Пономарев, «Дмитрий Коркин», «Александр Медведь» турнирдар финалистара Эдуард Григорьев, эдэрдэргэ Арассыыйаҕа бастыыр иһин күрэс боруонса призера Айтал Захаров уонна Казахстаҥҥа ыытыллыбыт норуоттар икки ардыларынааҕы турнир кыайыылааҕа Константин Власов таҕыстылар.

61 кг бастакы эргииргэ Айтал Захаров Джо Колоҥҥа (АХШ) ыраастык барда. Егор Пономарев Бека Ломтадзеҕа (Грузия) 0:8 ахсаанынан баһыйтарда. Эдуард Григорьев Иван Гуйдяны (Румыния) кыайан баран, Галиб Алиевка (Азербайджан) 3:3ахсаанынан хоттордо. Салгыы Егор Пономарев “утешиловкаҕа” Гарик Барсегяҥҥа(Армения) кыайтарда (3:10).

70 киилэлээхтэргэ Константин Власов куһаҕана суохтук кииристэ. Бастаан Марк Дитшены (Швейцария) ыраастык хотто, онтон Назар Кульчицкайы кыайда — 2:0. Салгыы аан дойду 2017 сыллаах чөмпүйүөнэ Зураб Якобашвилины (Грузия) кытта хапсыһыыга тиһэх сөкүүндэҕэ диэри хотон иһэн, уодаһыннаах албаска түбэһэн хотторуу хомолтотун биллэ.

Онон биир да бөҕөспүт финал чиэппэрин ааспата.

0
0
comments powered by HyperComments