Арассыыйа үрдүк үөрэҕин кыһалара сыыйа кэтэхтэн үөрэхтэн кэтэхтэн-киэһээҥҥигэ көһүөхтэрин сөп үһү. Ити туһунан санааны аҕыйах хонуктааҕыта дойду үөрэҕин уонна наукатын миниистирэ Ольга Васильева Читаҕа Забайкальскай кыраай үрдүк үөрэҕин кыһаларын преподавателлэрин, бэрэпиэссэрдэрин састаабын кытта көрсүһүүтүн кэмигэр эттэ.
Сымыйа кэтэхтэн үөрэҕи суох оҥоруохпутун наада диэн иһитиннэрдэ. “Бүтэһик сыл юридическай кэтэхтэн үөрэҕи тохтоппуппут. Сотору экэнэмиичэскэйи суох оҥоруохпут. Ити курдук кэтэхтэн үөрэҕи киэһээҥҥи-кэтэхтэн көһөрүөхтээхпит”, — диэн бэлиэтээтэ. Эбиитин, сыыйа тутааччылары, инженердэри, энергетиктэри, уо.д.а. исписээлинэстэри хаарыйыан сөп диэн этэн аһарда.
Миниистир, кэтэхтэн үөрэх идэ таһымын үрдэтиигэ эрэ туһаныллыан сөптөөх ньыма диэн ТАСС кэрэспэдьиэнин кытта сэһэргэһэригэр эппит. Ол эбэтэр, абитуриент номнуо ханнык эрэ базовай үөрэхтээх, ол эрээри, исписээлинэһигэр чугас иккис үрдүк үөрэҕи ылар түгэнигэр туһаныллыан сөп үһү.
Оччотугар, икки сүрүн кыһалҕа күөрэйэр. Бастатан туран, киэһээҥҥи үөрэххэ үлэ чааһын кэнниттэн үөрэнэллэрэ биллэр. Улуус олохтоохторугар хас даҕаны сылы эргиччи оннук үөрэнэллэрэ кыаллымыан сөп. Иккиһинэн, кэтэхтэн үөрэхтээҕэр кэтэхтэн-киэһээҥҥи сыаната лаппа үрдүк буолара сэрэйиллэр.
