Дьикти кэрэ айылҕалаах, саппааһа биллибэт араас сир баайдаах кэрэ дойду Кэмпэндээйи арай арыы-сыа аллар нүөл оттоох сыһыыларынан, алаастарынан, өҥ хочолордоох үрэхтэринэн тутахсыйар. Ол да иһин былыр даҕаны, аны даҕаны кэмпэндээйилэр сүөһү иитиитинэн хото дьарыктамматтар эбит.
Дьэ, ону ол диэбэккэ, Кэмпэндээйитээҕи тууһу хостуур хампаанньа генеральнай дириэктэрэ Алексей Игнатьев көҕүлээһининэн, урут «Тойбохой» сопхуос отделениелара оттуур «Сооруос» диэн Кэмпэндээйиттэн 4 көстөөх үрэх сиргэ сылгы иитэр баазаны тэринэн эрэллэр. Бу дьыаланы миэстэтигэр урукку өттүгэр араас саҥа саҕалааһыннарга толлубакка киирсэн иһэр аныгылыы өйдөөх-санаалаах Виктор Иванов-Кырбый Бииктэр иилиир-саҕалыыр эбит. Кэмпэндээйигэ сылгы баазатын тэрийэргэ олохтоох уолаттары түмэн, сүүрэн-көтөн үлэлээн-хамсаан эрэр.
Төһө да сааһыра быһыытыйдар, синбиир араас идиэйэлэринэн «оргуйа» сылдьар Виктор Иванову көрүстүм.
Кини кэпсииринэн, ити сылгы баазатын тэринэн онно үлэлииргэ баҕалаах уолаттартан Александр Семенов «Саҥа саҕалыыр фермер» анал туругу көмүскээн, 1,5 мөл. солк суумалаах грант ылбыт. Уолаттар ол харчыларынан ыраах Өймөкөөнтөн, Чурапчыттан саха боруода сылгыларын ыларга дуогабардаспыттар. Быйыл саас Виктор Иванов бэйэтэ Чурапчы, Амма, Мэҥэ-Хаҥалас, Бүлүү улуустарын сылгы иитэр бастыҥ хаһаайыстыбаларын үлэлэрин билсэн-көрсөн, уопут атастаһан кэлбит.
Мантан күһүн элбэх тэрээһин үлэ кэтэһэр. Ол курдук, сылгыһыттарга аналлаах дьиэ-уот, сылгыны тутарга күрүө-хаһаа оҥоһуллуохтаах.
Быйыл уолаттар оттоммотоҕо отучча сыл буолбут Сооруос үрэх эргин Василий Семенов салалтатынан сүүрбэччэ тонна оту аҥардас илиинэн оттообуттар. Аны саас олунньу, кулун тутар ыйдарга бастаан отучча сылгыны аҕалыахтаахтар эбит. 5-6 сылынан сылгыларын 100-150 төбөҕө тириэрдэр былааннаахтар. Инньэ гынан, дьон-сэргэ тоҕуоруспатаҕа, тиэхиньикэ ньирилии тыаһаабатаҕа отучча сыл буолбут, сэрэйдэххэ эһэ-бөрө баайдаах, хаһан эмит хара суор халаахтаан ааһар иччитэх сирин Кэмпэндээйи хоһуун уолаттара саҥа тыыннаары сылдьаллара хайҕаллаах уонна кэрэхсэбиллээх дьыала диэххэ наада. Ити кинилэр курдук араас быраҕыллыбыт сирдэрбитин, үрэхтэрбитин хос сөргүтэн туһаҕа таһааран истэрбит ханнык.
«Кытаатыҥ, уолаттар!», — диибит!
