29 Кулун тутар 29.03
  • -14°
  • $ 92,26
  • 99,71

Кэлэр кэм дипломаттарын билиилэрин таһыма үрдүк

Читайте нас на
Яндекс Новости
ЯДВ

Норуоттар икки ардыларынааҕы Интеллектуальнай оонньуулар чэрчилэринэн ЮНЕСКО бэрэстэбиитэллэрин оруолугар киирэн, 58 үрдүкү кылаас оҕото “Кэлэр кэм дипломата”  дьыалабыай оонньууга кыттыыны ылла.

edersaas.ru

РФ МИД-ын  Дьокуускайдааҕы бэрэстэбиитэлистибэтин иһинэн үлэлиир «Интерсфера» ыччат уопсастыбаннай тэрилтэтин бэрэсидьиэнэ,  1 кылаастаах советник Николай Дьяконов иһитиннэрбитинэн, бу тэрээһин 2006 сылтан ыытыллар.

Ол да иһин 12 сыл тухары салайааччылар оҕолорун дойду устун сырытыннаран, араас таһымнаах дьыалабыай оонньууларга кытыннараллар эбит. Онон “Кэлэр кэм дипломата”  дьыалабыай оонньуу кыттыылаахтара таһымнара үрдүгэ сөхтөрдө.

Хас биирдии кыттааччы биир дойдуну ылан, ол дойду бэрэстэбиитэлин быһыытынан дипломатическай этиини бэлэмниир. Биллэн турар, оҕолор бу тэрээһиҥҥэ эрдэттэн бэлэмнэммиттэрэ харахха быраҕыллар.

Норуот дипломатиятын сайыннарыы — ЮНЕСКО биир суолталаах хайысхата. Оҕолор бу маннык  тэрээһиҥҥэ санааларын хото этинэргэ, бэйэлэрин тылларын ылыннарарга үөрэнэллэр.

17 саастаах Валерий Малардыров Дьокуускай куорат 19 №-дээх оскуолатыгар үөрэнэр. Уол Эфиопия Федеративнай Демократическай Өрөспүүбүлүкэтин сирэйдээтэ. Хас биирдии дакылаатчыт кэнниттэн ким туох ыйытыылаах тута боппуруостарын суруйан баран, мандааттарын ууналлар. Ол ону көрө сылдьан, волонтердар боппуруостары туһааннаах дакылаатчыкка тиэрдэллэр. Валерий дакылааттары сүрдээх болҕомтолоохтук истэр уонна бэлиэтэнэ олорор. Оҕолор ЮНЕСКО мунньаҕын бэрээдэгинэн интэриэһиргээбит боппуруостарын маннык бэлэмнииллэр эбит.

Дьыалабыай оонньууга оҕолор бөлөхтөргө хайдыһан резолюция бэлэмнээн көмүскээтилэр. Cаамай тыҥааһыннаах киирсии манна буолла. Биир өттүнэн ыллахха, оҕолор дойду араас куораттарыттан уонна өрөспүүбүлүкэ улуустарыттан сылдьар буолан, маннык бөлөхтөргө бэйэ-бэйэлэрин кытта ыкса билистилэр уонна санааларын  сайа этинэргэ үөрэннилэр.

«Кэлэр кэм дипломата» оонньуу түмүк күнүгэр кыайыылаахтар ааттаннылар.  «Резолюция бастыҥ ааптара» номинацияҕа Вадим Петров тигистэ. «Бастыҥ дэлэгээт» аатын Калининградтан Алиса Зенькина ылла.

РФ МИД-ын  Дьокуускайдааҕы бэрэстэбиитэлистибэтин иһинэн үлэлиир «Интерсфера» ыччат уопсастыбаннай тэрилтэтин бэрэсидьиэнэ,  1 кылаастаах советник Николай Дьяконов дьыалабыай оонньуу түмүгэр СӨ Үөрэх уонна наука министиэристибэтигэр, «Кэлэр кэм дипломата» диэн өрөспүүбүлүкэтээҕи дьыалабыай оонньууну тэрийбит Мария Петроваҕа 12 сыл анараа өттүгэр Арассыыйаҕа суох тэрээһини тэрийбитигэр истиҥ махталын тиэртэ.

Талааннаах оҕолорго суолларын тэлэр «Кэлэр кэм дипломата» дьыалабыай оонньуу Саха сиригэр эрэ ыытыллар уонна бүгүҥҥү күҥҥэ дойду регионнарыгар холобурга сылдьар.

Елена ПОТОЦКАЯ, «Саха сирэ» хаһыат, edersaas.ru

Следите за самым важным и интересным в Telegram-канале и WhatsApp-группе ЯСИА
Тутаах тыллар