«Мамонтенок» норуоттар икки ардыларынааҕы бэстибээлгэ куонкуруска кыттааччылар араас куораттартан уонна дойдулартан кэлитэлээн эрэллэр. Бүгүн Дьокуускайга эдэр циркачтар Краснодар, Пермь, Челябинскай уобаластан уонна Казахстантан кэллилэр, диэн СИА иһитиннэрэр.
Бүгүн бэстибээл Россия регионнарыттан эдэр астыыстары уонна Казахстантан куонкуруска кыттар улахан дьону көрүстэ. Сарсын Дьокуускай куоракка VI Норуоттар икки ардыларынааҕы «Мамонтенок-2019» циркэ бэстибээлэ буолар. Арменияттан, Вьетнамтан, Израильтан, Казахстантан, Колумбияттан, Монакоттан уонна да атын дойдулартан, Россия регионнарыттан бастыҥ циркачтар кыттыахтара.
Икки оҕо Краснодартан, үс – Казахстантан, биэс Челябинскайтан, сэттэ Пермьиан кэллилэр. Саамай эдэр кыттааччы сааһа — 6.
«Феерия» эдэр циркачтар устуудьуйалара (Южно-Уральск) эквилибр уонна акробатика көрдөрүөхтэрэ, Полина Фисенко «Леди Паук» номерынан кыттыа, «Грация» циркэ устуудьуйата Перьмтан бөлөҕүнэн торуоскалаах эквилибр толоруо. Кинилэр куонкурстуур бырагыраамалара Саха сирин хамаанджатын кытта сөп түбэһэр «Поколение NEXT» III буолар.
Быйыл «Мамонтенок» аан бастакытын сааһынан араарыыны киллэрэр. Ол иһин кыттааччы ахсаана элбэх, географията киэҥ. Оҕолору уонна улахан дьону тус-туспа сыаналыахтара.
Бэстибээл куонкурустаһар бырагырааматын сабыллыыта алтынньы 5 күнүгэр буолуоҕа, оттон алтынньы 6 күнүгэр Дьокуускайдааҕы циркэ аренатыгар үбүлүөйдээх тэрээһин буолуоҕа. Алтынньы 9 — 13 күннэригэр гала-кэнсиэрдэргэ бастыҥ толоруулары көрдөрүөхтэрэ.
