Кальвица сэлиэнньэтин биир эрбэххэ баттанар, убаастанар Герой Ийэтэ, Российскай Федерация үлэҕэ бэтэрээнэ, Кэбээйи улууһун бочуоттаах олохтооҕо, сыана бэтэрээнэ уон оҕо, 22 сиэн, 22 сиэн хос эбэтэ Архипова Мария Николаевна бастакынан саҥа бөһүөлэккэ көстө. Кини үөрүүтүн үллэстэн аҕа саастаах дьону, аймахтарын саҥа сылаас дьиэтигэр малааһын оҥорон итии чэйдээх сандалы тула түмтэ.
Үлэ, тыыл бэтэрээнэ, государственнай премия лауреата, Кыһыл Знамя орден толору кавалера, хас да төгүллээх социалистическай-коммунистическай үлэ уонна пятилеткалар ударниктара, Кэбээйи улууһун бочуоттаах олохтооҕо, 91 саастаах Азаров Григорий Алексеевич оҕолоро тутан биэрбит дьиэлэригэр киирдэ. Олус кылгас кэм иһигэр саҥа тутуу дьэндэйэн, кырдьаҕас үөрдэ. «Бөһүөлэкпит наһаа үчүгэй, олорор дойдубун наһаа таптыыбын, аны ыраас, сылаас усулуобуйалаах дьиэҕэ көстүм. Эргэ бөһүөлэкпитин ытыктыаххайыҥ, кэлэ-бара сылдьыаххайыҥ» — диир кини.
Убаастанар кырдьаҕас, үлэ, тыыл бэтэрээнэ, Кэбээйи улууһун бочуоттаах олохтооҕо, 88 хаарыгар үктэнэр Гуляева Христина Игнатьевна эмиэ саҥа дьиэҕэ көһөр.
Варвара Григорьевна Азарова Российскай Федерация үлэҕэ бэтэрээнэ, Кэбээйи улууһун бочуоттаах олохтооҕо, сыана бэтэрээнэ, элбэх оҕо күн күбэй ийэтэ, эйэҕэс эбэтэ, хос эбэтэ эмиэ Ийэлэр күннэрин көрсө саҥа дьиэҕэ киирээри бэлэмнэнэр. Сиэн оҕото Григорий, төрөппүт уолаттара Азаровтар бэйэлэрин илиилэринэн тутан-хабан, кырдьар сааһыгар бэлэх ууннулар. Онон эбэлэрэ сылаас, ичигэс дьиэҕэ сиэн оҕолорун бүөбэйдэһэн дьоллоохтук, доруобайдык олоруо.
Кырдьаҕастар күннэригэр тэрилтэлэр саҥа бөһүөлэккэ субуотунньуктаатылар. Дьиэ ханапаакылаатылар, олбуор иһин ыраастаатылар, ис тэрили хомуйдулар.
Ааптар: Сергучева Е.С.
