Көһө сылдьан олохсуйар дьон норуоттар икки ардыларынааҕы II-c оонньууларыгар аан дойду чөмпүйүөнэ Дмитрий Попов муҥутуур кыайыылаах үрдүк аатын ылла уонна кыайыылаах курун баанна. Күрэхтэһии Кыргызстаҥҥа балаҕан ыйын 5 күнүгэр буолан ааста.
«Оонньуу быраабылатын быһыытынан утарсааччыларбын барыларын кытта кииристим. Барыларын 2:0 ахсаанынан кыайдым, оттон финалга Намтан Евгений Ивановы кытта күөн көрүстүм. Бастакы түһүмэххэ кыайдым, ол кэнниттэн Евгений атаҕын эчэтэн салгыы киирсибэтэ. Кыайыылаах үрдүк ааты ылбыппыттан үөрдүм», — диэн СИА-ҕа Дмитрий Попов эттэ.
Күрэхтэһии Жайлоо-Кырчын диэн Чолпон-Ата куорат чугаһыгар баар сиргэ ыытылынна. Манна Грузия, Бразилия, Монголия уонна Саха сирин ыарахан ыйааһыннаах атлеттара кииристилэр.
«Виктор Колибабчугу, Мартинс Лицисаны кытта тургутуһан көрөр баҕалаах этим. Кинилэр кэлиэхтэрэ дии санаабытым. Ол эрээри кинилэр манна кыттыбатахтара. Аныгыскы сылга аан дойду чемпионатыгар кыттар ыра санаалаахпын», — диир мас-рестлер.
Быйыл алтынньыга Екатеринбург куоракка мас тардыһыытыгар Россия абсолютнай чемпионата буолуоҕа. Дойду улахан ааттаах-суоллаах спортсменнара манна кыттыахтара, кинилэр ортолоругар Дмитрий Попов баар.
