Тутууга уонна дьиэни-уоту кэтээhиҥҥэ судаарыстыбаннай Управление Хаҥалас улууһун Күөрдэм нэһилиэгэр баар XIХ үйэтээҕи Николаевскай таҥара дьиэтин итиэннэ Дьокуускай Петровскай уулуссатыгар турар казначейство дьиэтин чөлүгэр түһэрии үлэлэрин хонтуруоллуур. Бу туһунан Управление пресс-сулууспата иһитиннэрэр.
Николаевскай таҥара дьиэтин 1892 сыллаахха таҥараны итэҕэйээччилэр бэйэлэрин үптэринэн туттарбыттар. Биир этээстээх мас тутуу «Самартай» историко-этнографическай мусуой комплексыгар киирэр.
Таҥара дьиэтин «Служба государственного заказчика РС(Я)» тэрилтэ сакааһынан «УРАН» дизайн студия ХЭТ сөргүтэр. Атырдьах ыйын 20 күнүгэр эбийиэги СӨ тутууга уонна дьиэни-уоту кэтээhиҥҥэ судаарыстыбаннай Управление салайааччытын бастакы солбуйааччы Влад Пермяков көрдө. Билигин дьиэ холлоҕоһун бүтүннүү көтүрэн, абырахтааһын, бөҕөргөтүү үлэлэрин ыыта сылдьаллар. Бетонтан кутуллар олох сирэ былааннаммыт.
«Биһиги үлэ бырайыак быһыытынан, тутуу нуорматын кэспэккэ, култуурунай эбийиэккэ охсуута суох барарын көрөбүт. Таҥара дьиэтэ улахан сөргүтүү үлэтин ааһыахтаах, былааннамыт үлэ эһиил бүтүөхтээх«, — диир Влад Пермяков.
Маны таһынан Управление Дьокуускай Петровскай уулуссатыгар турар казначейство дьиэтин чөлүгэр түһэрии үлэтин хонтуруоллуур. Билигин казначейство дьиэтигэр Национальнай художественнай түмэл М.Ф. Габышев аатынан омук искусствотын галереята баар.
