Истэ-билэ сылдьаргыт курдук, муус устар 7-8 күннэригэр Айова-Сити куоракка (АХШ) ыытыллыбыт көҥүл тустууга аан дойду Кубогын күрэхтэһиитэ олохтоохтор кыайыыларынан түмүктэннэ. Холбоһуктаах Штаттар тустууктара бу ситиһиини уон биэс сыл күүппүттэрэ.
Быраабыла быһыытынан, бу түһүлгэҕэ аан дойду чөмпүйэнээтин аҕыс бастыҥ хамаандата кыттар. Ол эрээри быйыл икки күүстээх хамаанда – Иран уонна Арассыыйа – күрэхтэһиигэ кыттыбатылар. Ол курдук, Ислам Өрөспүүбүлүкэтэ биллэр биричиинэнэн бэйэтэ АХШ барартан аккаастанан турар. Оттон АХШ Москватааҕы посольствота Арассыыйа тустууктарыгар виза ылыыга барыахтаах кэпсэтиини тэрийэртэн батыммытынан, бөҕөстөрбүт аан дойду Кубогар кыттар кыахтан маппыттара. Бу иннинэ туроктар Кубок күрэхтэһиитин көтүтэллэрин туһунан иһитиннэрбиттэрэ. Онон американецтар уон биэс сыл буолан баран, 2003 сылтан, аан бастаан Кубок хаһаайыннарынан буоллулар.
Көһүтүллүбүтүн курдук, кыайыылааҕы быһаарар түмүк көрсүһүүгэ АХШ уонна күүстээх састаабынан кыттыбыт Азербайджан хамаандалара таҕыстылар. Тутаах хапсыһыыларга 65 киилэҕэ диэри ыйааһыҥҥа аан дойду 2016 сыллааҕы чөмпүйүөнэ Логан Штибер аан дойду үс төгүллээх чөмпүйүөнүн Хаджи Алиевы уонна 79 киилэлээхтэргэ Кайл Дейк Рио-де-Жанейротааҕы Олимпиада призерун Джабраил Гасановы кыайан хамаандаларыгар олус наадалаах очукуолары аҕаллылар. Онон американецтар 6:4 ахсаанынан хотуулаах таҕыстылар. Манна даҕатан эттэххэ, АХШ күөн туттар бөҕөстөрө — олимпийскай чөмпүйүөннэр Джордан Барроуз (74 кг) итиэннэ Кайл Снайдер (97 кг) бу түһүлгэҕэ аҥардас кыайыы эрэ көтөллөннүлэр.
Куба хамаандатын 6:4 ахсаанынан баһыйбыт Япония тустууктара боруонса мэтээли ыллылар.
Көҥүл тустууга аан дойду Кубога.
Муус устар 7-8 күннэрэ, Айова-Сити, АХШ
- США.
2. Азербайджан.
3. Япония.
4. Куба.
5. Грузия.
6. Монголия.
7. Казахстан.
8. Индия.
Роман ПОПОВ, “Саха сирэ” хаһыат, edersaas.ru
