Таатталыы олоҥхону тарҕатааччы Акулина Егасова-Дьохсоҕон Кыыһын салалтатынан ыраах Өймөкөөн улууһугар норуот тылынан уус-уран айымньытын – олоҥхону сөргүтэр сыаллаах дэлэгээссийэ ыалдьыттаата.


Өймөкөөҥҥө олоҥхону таҥан суруйар Акулина Егасова-Дьохсоҕон кыыһа көҕүлээһининэн СӨ биллиилээх олоҥхо толорооччулара – Таатта улууһун «Удьурҕай» олоҥхо түмсүүтүн салайааччыта, СӨ биир биллэр кылыһахтаах Раиса Маркова, СӨ биллиилээх олоҥхоһута Алексей Николаев-Олоҥхоһут Өлөксөй, Сунтаар улууһун «Ньургуһун» литературнай түмсүү чилиэнэ, нэһилиэк «Тымтык» оҕуруотчуттар түмсүүлэрин чилиэнэ Марианна Васильева-Умтичаана уонна Байан диэн эдэр кэскиллээх олоҥхоһут ыалдьыттаатылар.

Семен Сивцев-Өймөкөөн Сэмэнэ кэпсииринэн, бастакы күҥҥэ Өймөкөөннөөҕү орто оскуолаҕа көрсүһүү буолла. Оскуола  учууталлара уонна үөрэнээччилэрэ  хомус  тыаһынан ыалдьыттары уруйдуу көрүстүлэр,  эҕэрдэ нүөмэрдэрин бэлэх ууннулар. Акулина Михайловна олоҥхо туһунан санаатын үллэһиннэ, мустубуттар санааларын атастастылар. Сунтаар улууһун «Ньургуһун» литературнай түмсүү чилиэнэ Марианна Васильева-Умтичаана айымньылаах үлэтин туһунан сэһэргээтэ уонна эбээннии ырыа ыллаан иһитиннэрдэ. Раиса Семеновна уонна Олоҥхоһут Өлөксөй оҕолорго, интэриэстээх дьоҥҥо олоҥхону толорууга сөпкө тыыныы ньымалар кистэлэҥнэрин, дорҕоон кэрэтик дуорайыытын албастарын көрдөрөн, туһалаах маастар-кылаас ыыттылар.

Алексей Николаев Былатыан Ойуунускай  «Дьулуруйар Ньургун Боотур» олоҥхотуттан бастакы уонна иккис ырыаларын толоруутун уонна Раиса Маркова М.Н. Андросова-Ионова «Силлирикээн эмээхсин икки Күлкүл бөҕө оҕонньор икки» олоҥхотуттан быһа тардыыны толордулар. Кинилэри тыыммакка да олорон иһиттилэр, өбүгэлэрбит тыһыынчанан сылга муспут билиилэрэ, үөрэхтэрэ барыта олоҥхоҕо сааһылана сылдьарын итэҕэйдилэр.

Оҕолор айылҕа матырыйаалларыттан экспонаттары (сал. С.С. Сивцев) оҥорбуттара элбэх киһи болҕомтотун тарта. Маны таһынан,  куукула тыйаатырга дьарыктанааччылар Олоҥхо персонажтарыгар анаан куукула көстүүмнэрин тикпиттэрин  көрдөрдүлэр. Оскуола кыргыттара авангарднай национальнай көстүүмнэри (сал. М.С. Иванова) подиумҥа хааман көрдөрдүлэр.

Сарсыҥҥы күн Өймөкөөн дьоно-сэргэтэ биир киэн туттар киһитин, аар саарга аатырбыт атыыһыт-меценат Ньукулай Уоһукабыс Кырбаһааҥкын уһаайбатыгар экскурсияттан саҕаланна. Онтон Үрэх Төрдүгэр баар Өксөкүлээх Сэргэлэригэр тиийэн, эмиэ сахалар биир киэн туттар улуу киһибитигэр сүгүрүйэн алаадьынан айах туттулар. Томтордооҕу Н.М. Заболоцкай-Чысхаан аатынан кыраайы үөрэтэр мусуойга сылдьан, Өймөкөөн устуоруйатын туһунан билистилэр.

Өймөкөөҥҥө былыр олоҥхоһуттар уутуйан үөскээбиттэрэ эмиэ биллэр. Ол эрэн кэлин сүтэн, симэлийэн хаалан, төрүт үгэстэр эмиэ умнууга баран эрэллэр. Баҕар бу тэрээһинтэн кыра кыым саҕыллыа, олоҥхо алыптаах эйгэтэ сөргүйүө.

Ааптар: Надежда КОРЯКИНА

0
0
comments powered by HyperComments