Өймөкөөн урбаанньыта Тамара Васильева Арассыыйа дьыалабыай дьахталларын күрэҕэр кытынна

Москубаҕа «Савой» бизнес-отельга Арассыыйа дьыалабыай дьахталларын «Успех-2018» Бүтүн Арассыыйатааҕы 14-с куонкуруһа ыытыллыбыта. Манна дойду дьыалабыай дьахталлара чиэстэмиттэрэ. Олор истэригэр туризмынан дьарыктанар  Өймөкөөн нэһилиэгин олохтооҕо, кыраайы үөрэтээччи, урбаанньыт Тамара Васильева баар. Кини «Кыһыл көмүс көтөр» түөскэ кэтэр бэлиэнэн наҕараадаламмыта.


Өймөкөөн улууһугар айар-тутар, үлэттэн дьоллонор Тамара Васильева соторутааҕыта дойду тэбэр сүрэҕэр Арассыыйа дьыалабыай дьахталларын күрэҕэр кыттан кэллэ.

— Арассыыйа араас муннуктарыттан мустубут үлэһит, ытыктанар дьахтар элбэҕиттэн киһи сөҕөр, — диэн кэпсиир Тамара Егоровна. — Мин үгүс араас идэлээх, саастаах дьахталлары кытта билистим, кэпсэттим. Үксүлэрэ үөрэхтээһин: оҕо уһуйаанын, дьааһыла арыйыы, оҕолорго култуурунай, кружковай үлэни ыытыы өттүнэн элбэх ситиһиилээхтэр. Мин чуолаан Москуба таһынааҕы Балашиха куорат литейнай-механическай собуотун дириэктэрин уопсастыбаннаһы кытта сибээһин солбуйааччытын, Арассыыйа суруйааччыларын Сойууһун чилиэнин Галина Романованы кытта билистим.

Кини кыра бөһүөлэги итиинэн хааччыйар генератордар пилотнай бырайыактарын оҥороллорун туһунан кэпсээбит. Бу тэрил тургутуутун тымныы полюһугар ыытыахха баар эбит диэн санаатын эппит. Маннык тымныы усулуобуйалаах сиргэ туризм салаатынан дьарыктанарын сөҕөн, сүгүрүйэн туран, бэйэтэ суруйбут элбэх хоһоонноох кинигэтин Тамараҕа бэлэхтээбит.

— Мин эмиэ киниэхэ Өймөкөөн туһунан кинигэбин бэлэх ууннум. Бу тэрээһиҥҥэ биир да киһи национальнай көстүүмү кэппэтэх, мин соҕотох этим. Наһаа үчүгэй көстүүмнээх эбиккин диэн дьон бары сэҥээрбитэ, — диир кини.

«Успех моей жизни» номинацияҕа «Кыһыл көмүс көтөр» түөскэ анньыллар бэлиэнэн Тамараны кытта үс киһи бэлиэтэннэ. Ону тэҥэ кини дипломунан наҕараадаламмыта. Атыттарга боруонса статуэткалары туттарбыттар. Наҕараадалааһын кэмигэр экраҥҥа презентация көстөр, тугунан дьарыктанарын, туох ситиһиилээҕин о.д.а. кэпсииллэр.

— Маннык тэрээһин, дьиҥэр, киһи уопут атастаһар былаһаакката буоллаҕа дии. Араас хайысханан кыттааччы элбэх, оттон туризм өттүгэр мин соҕотох этим. Онон хомолтолооҕо диэн, уопут атастаһар киһим суох буолан биэрдэ. Куонкуруска дьахтар аймах эрэ буолбакка, бүттүүн тэрилтэлэр, дьаһалталар, оннооҕор нэһилиэнньэлээх пууннар эмиэ кытыннылар. Маннык хабааннаах куонкурустары Саха сиригэр  тэрийиэххэ сөп эбит дии санаатым. Бэйэ-бэйэни кытта уопут атастаһыыта улахан туһалаах буолуо этэ, — диир Тамара Васильева.

Кини Москубаҕа үс хоммут, Өймөкөөҥҥө туристара кэтэһэллэриттэн  үөрүүлээх тэрээһиҥҥэ сылдьан баран, дойдутугар төннүбүт. Бу күннэргэ Өймөкөөҥҥө Баварияттан, Арассыыйа тэлэбиидэнньэтин 1-кы ханаалыттан кэлэн бардылар. Билигин туристар халҕаһалаан кэлэр сезоннара саҕаланна.

— Мин Бүтүн Арассыыйатааҕы «Дьыалабыай дьахтар-2018» куонкуруска кыттан бэйэм үлэм түмүгүн туораттан, дьон хараҕынан көрбүтүм кэрэхсэбиллээх. Үлэбин сыаналаан, улахан наҕараадаҕа түһэрбиттэринэн, Арассыыйа дьыалабыай дьахталларын ахсааннарыгар киирбиппинэн үөрэбин уонна киэн туттабын. Элбэх киһини кытта билистим, араас тиэмэҕэ кэпсэттим, үгүс саҥаны-сонуну биллим, — диир Тамара.

Ааптар: Надежда КОРЯКИНА

This post was published on 21.12.2018 14:55 14:55