19 Кулун тутар 19.03
  • -10°
  • $ 91,98
  • 100,24

Өймөкөөн Төрүтүн ыччата Үтүө дьулуур сылыгар көхтөөхтүк кытынна

13:22, 07 декабря 2018
Текст:
Читайте нас на
Яндекс Новости
ЯДВ

Ааһан эрэр сыл Өймөкөөн улууһугар Үтүө дьулуур (Волонтер), өрөспүүбүлүкэҕэ Нэһилиэнньэ дьарыктаах буолуутун көҕүлүүр сылларынан биллэриллибитэ. Бу хамсааһыны эдэр ыччат өрө көтөҕүллүүлээхтик ылынан, улуус социальнай-экэнэмиичэскэй сайдыытыгар тутаах күүһүнэн буолла. Араас хайысхаҕа барытыгар көхтөөхтүк кытынна, үгүс ситиһиилэннэ.


Үтүө дьулуур (Волонтер) аан дойдутааҕы күнүнэн ситимнээн Төрүт нэһилиэгин “Ситим” эдэр ыччат түмсүүтүн лидерын Надежда Босиковаттан «Хотугу сардаҥа» хаһыат кэрэспэдьиэнэ сыл устата туох-ханнык үлэ барбытын туһунан сырдатарыгар көрдөстө.

— Үтүө дьулуур (Волонтер) уонна өрөспүүбүлүкэҕэ Нэһилиэнньэ дьарыктаах буолуутун көҕүлүүр сылын “Ситим” ыччат түмсүүтэ олохтоох Култуура дьиэтин кытта холбоһон, Ороһооспо күнүгэр аһымал кэнсиэринэн саҕалаабыта. Онно киирбит үбүнэн волейбол мээчигин уонна сетканы атыыласпыппыт. Саас нэһилиэк актыбыыстара аахсыйаҕа кыттан, тыыл бэтэрээннэригэр минньигэс туорт оҥорон бэлэх ууммуттара, күһүн кырдьаҕастар күннэринэн сибээстээн, кыһыл отон хомуйан биэрбиттэрэ, — диир Надежда.

Нэһилиэк ыччатын лидерэ маны сэргэ сыл устата нэһилиэк дьаһалтатын уонна “Ситим” ыччат түмсүүтүн актыбыыстарын көҕүлээһининэн үгүс субуотунньук ыытыллыбытын туһунан сырдатта. Ол курдук, Улуу Кыайыы бырааһынньыгын иннинэ дьаһалтаҕа үлэлиир эр дьон Семен Босиков, Николай Атласов, нэһилиэк олохтоохторо Семен Горохов, Петр Егоров, Константин Кривошапкин түһүлгэ тротуардарын саҥардыбыттар, сыананы өрөмүөннээбиттэр. Ыччат, оҕолор хомуйбут бөхтөрүн-сыыстарын бөһүөлэк таһыгар таһаарбыттар.

Оҕо көмүскэлин уонна Арассыыйа күннэрин саҕана бөһүөлэккэ аныгылыы тииптээх оҕо былаһааккатын хомуйан туруоран биэрбиттэр. Бу кэлин кырачааннар сөбүлээн оонньуур сирдэригэр кубулуйда.

Атырдьах ыйыгар бэлиэтэнэр Арассыыйа былааҕын күнүн чэрчитинэн ыччат лидерэ бэйэтин баҕатынан үбүлээн, “Ситим” ыччат түмсүүтүн кубогар волейболга күрэхтэһии буолбута. Тэрээһин иннинэ волонтердар Дима Егоров, Владимир Лысов, Арсений Атласов волейбол сеткатыгар анаан остуолбалары туруорбуттара, сетканы ыйаабыттара, онтон Култуура дьиэтин үлэһиттэрэ былаһаакканы ыраастаан бэлэмнээбиттэрэ.

Нэһилиэк сирин-уотун ыраастааһынтан оскуола оҕолоро эмиэ туора турбаттар. Кинилэр “Ыраас тэлгэһэ”, “Ыраас биэрэк”, “Бэтэрээҥҥэ көмөлөс” диэн ырааһырдыы аахсыйаларыгар ыччаты кытта тэҥҥэ көхтөөхтүк  кыттыбыттара. Ону сэргэ оскуола оҕолоро хас саас уонна күһүн аайы тыыл бэтэрээннэригэр уонна кырдьаҕас дьоҥҥо көмөлөһөн тимуровскай үлэни тэрийэллэр.

Быйыл икки улахан суолталаах быыбар буолла – Арассыыйа Бэрэсидьиэнин уонна Саха сирин Ил Дарханын таллыбыт. Бу дьаһаллары ыытарга С.М. Григорьева, В.О. Дьяконова, Е.Н. Горохова эмиэ актыыбынайдык кытыннылар. Маныаха ыччат түмсүүтэ быыбар кэмигэр араас аахсыйаны тэрийиини көҕүлээччинэн буолбута.

Сайын халааҥҥа эмсэҕэлээбит Амма улууһун дьонугар көмөлөһөр сыалтан аһымал кэнсиэр оҥорон, Төрүт ыччата өрөспүүбүлүкэ дьонугар көмөлөспүтэ. Мантан ураты кыаммат ыалга аналлаах көмө аахсыйалара тиһигин быспакка бараллар.

Ааптар: Надежда КОРЯКИНА, «Хотугу сардаҥа» хаһыат

Следите за самым важным и интересным в Telegram-канале и WhatsApp-группе ЯСИА