“Өймөкөөн сулустара” вокальнай куонкурус идэһэ күнүгэр ыытылынна

Ааспыт өрөбүлгэ Өймөкөөн улууһун киинигэр үгэскэ кубулуйбут “Идэһэ-2018” олохтоох бородууксуйа дьаарбаҥката буолла. Бу күн улуус талааннаах дьонун вокальнай куонкурустара ыытылынна.


Өймөкөөн улууһун нэһилиэктэриттэн тыа хаһаайыстыбатын бородууксуйатын оҥорон таһаарааччылар ынах, убаһа этин, балык, үрүҥ ас, арыы хамаҕатык атыылаатылар. Дьаарбаҥка түмүгүнэн ордук элбэх бородууктаны атыылаабыт Томтор нэһилиэгэ бастаата, онтон өймөкөөннөр иккис уонна Сордоҥноох нэһилиэгэ үһүс миэстэлэргэ тигистилэр.

“Өймөкөөн сулустара” куонкуруска 16-тан 35-гэр диэри саастаах самодеятельнай артыыстар кытыннылар. Тымныы полюһа талааннаах дьонунан баай, бу күн улуус киинин олохтоохторо “Металлург” култуура дьиэтигэр тобус толору мустан, дуоһуйа сынньаннылар.

Улуус баһылыгын Михаил Захаров 10 тыһ. солк. суумалаах Гранын хаһаайынынан Өймөкөөн нэһилиэгин кулуубун дириэктэрэ Ульяна Захарова буолла. Куонкурус быйыл «Үтүө дьулуур» сылыгар уонна Ленинскэй Комсомол тэриллибитэ 100 сылыгар ананна. Ырыаһыаттар комсомольскай ырыалары, иккискэ эстраднайы толордулар.

“Уус-Ньара бөһүөлэгэ” МТ дьаһалтатын баһылыгын Александр Роданич анал бирииһэ улуустааҕы дьаһалта үлэһитигэр Анна Муратоваҕа тигистэ. Маны таһынан бастыҥ лирическай ырыа, ааптарскай ырыа, Кураж, нүөмэри бастыҥ туруоруу курдук номинациялар хаһаайыннарын буллулар.

Куонкурус уонна дьаарбаҥка туһунан сиһилии “Севернай заря”-“Хотугу сардаҥа” хаһыаттарга ааҕыҥ.

Любовь Кривошапкина, ааптар уонна Юлия Фролова хаартыскаҕа түһэриилэрэ

This post was published on 19.11.2018 16:34 16:34