Бу күннэргэ уһун ардахтартан Индигир өрүс хаатыттан тахсан, Өймөкөөн уонна Сордоҥноох нэһилиэктэрэ ууга былдьанан, улууска ыксаллаах быһыы-майгы балаһыанньата биллэрилиннэ.
Өймөкөөн нэһилиэгин дьаһалтатын иһинэн үлэлиир ыксаллаах быһыы-майгы салаатын исписэлииһэ Ньургун Попов иһитиннэрбитинэн, атырдьах ыйын 24 күнэ үүнэр түүнүгэр нэһилиэккэ күүстээх сүүрүүктээх уу халыйан киирэн, олорор дьиэлэри, уһаайбалары ылла.
Оттон Сордонноох нэһилиэгин Томтору кытта ситимниир Куйдуһун муостата үс сиринэн улаханнык алдьанна. Бу маннык улахан мотуок үс сыллааҕыта буолбут халаан таһымнаах диэн олохтоохтор бэлиэтииллэр. Үгүс ыал сайыны быһа бүөбэйдээбит оҕуруоттара, үүнээйилэрэ бүтүннүү ууга барда. Ньургун Попов этэринэн, ыксаллаах түгэн буоллаҕына, дьону эвакуациялыыр пууннар бэлэмнэр. Ол курдук, оскуолаҕа уонна кулуупка дьону олохтуурга бары усулуобуйа тэрилиннэ. Олохтоох дьаһалта тэрийиитинэн, мотуордаах оҥочонон ууга хаайтаран олорор дьоҥҥо дьиэнэн килиэптэрин тиэрдэн биэрэллэр. Эппиэттээх үлэһиттэр уу ылбыт социальнай эбийиэктэрин мотуордаах оҥочонон кэрийэ сылдьан, хаартыскаҕа түһэрдилэр, тустаах докумуоннары толордулар.
Сордоҥноох нэһилиэгин дьаһалтатын баһылыга Иван Максимов иһитиннэрбитинэн, 5 ыал уһаайбата ууга барда. Оттон ходуһа уонна оттоммут от туһунан киһи этэ да барбат — барыта ууга былдьанна. Бу нэһилиэккэ эмиэ иллэрээ сыллааҕы улахан халаан хатыланыах курдук. Нэһилиэги Томтору кытта ситимниир Куйдуһун муостата биэрэги кытта холбуур 6 м силбэһигин уу суурайда. Онон олохтоохтор эмиэ өр кэмҥэ сырыыта суох хааллылар. Бу маннык ыксаллаах балаһыанньаҕа өрүүтүн ылларар нэһилиэк баһылыга хайа күн дуоһунаһыгар олоруоҕуттан, кыһыҥҥы суол баарына, куорат сыанатынан күннээҕи наадалаах бородууктаны эрдэттэн хаһаанан атыылаһан кэбиһэр. Ол бородууктарын биирдэ атыылаан кэбиспэккэ, сайыны быһа удамыр сыанаҕа кэмнээн атыылыыр буолан, сордонноохтор кыһыҥҥы суол аһыллыар диэри сөптөөх бородууктанан хаааччыллыылаахтар. Муосталара алдьанан, айанньыттар Куйдуһун үрэҕи эмиэ сатыы хааман, эрэһиинэ оҥочонон туораан эрэйдэнэр буоллулар. Бэлиэтээн эттэххэ, үс сыллааҕыта бу нэһилиэк эр дьоно хочуолунайдарын үлэҕэ киллэрээри, уу түспүтүн кэннэ, улахан турбалары биэрэктэн биэрэккэ сатыы санныларыгар сүгэн таспыттаахтар.
Улуус муниципалитетын баһылыга Михаил Захаров Индигир Эбэ эмискэ улаатан, улуус нэһилиэктэрэ бары да ыксаллаах балаһыанньаҕа киирдилэр диэн бэлиэтиир. Төрүт нэһилиэгэр эмиэ уу тахсыа диэн бэлэм олороллор. Онон баһылык улууска ыксаллаах быһыы- майгы балаһыанньатын киллэрэн, бырабыыталыстыба хамыыһайата миэстэтигэр көрөн-истэн барарыгар үлэлэһэн эрэбит диэн иһитиннэрдэ. Ол курдук, сэрэдэ күн тута СӨ Айан суолларын государственнай управлениетын салайааччытын бастакы солбуйааччы Алексей Федоров быһыыны-майгыны миэстэтигэр билсэ Томторго тиийдэ. Оттон бу күн өрөспүүбүлүкэтээҕи ыксаллаах быһыы-майгы хамыыһыыйатын мунньаҕа буолла. Онно биир бастакынан Өймөкөөҥҥө буолбут халаан боппуруоһа көрүлүннэ. Онон уустук быһыы-майгы бырабыыталыстыба анал хонтуруолугар турар.
Ыксаллаах быһыы-майгы билэриллээтин кытта, Өймөкөөн нэһилиэгин дьаһалтатын баһылыга Павел Васильевы кытта билсэ сырыттым. Баһылык иһитиннэрбитинэн, бүгүҥҥү күннээҕи туругунан быһа холуйан нэһилиэк 350 га оттуур ходуһата ууга барда. Отчуттар бу күннэргэ хомуйуохпут диэн охсубут 35 га отторуттан кураанаҕы кууһан хааллылар. Моой отчуттар 54 тонна оттоммут отторуттан көрбүтүнэн мэлийдилэр. Оттон саха ынаҕын ииттэр Винокуровтар дьиэ кэргэн хаһаайыстыбаларын отучча тонна отторо эмиэ туһаттан таҕыста. Хаһаайыстыба салайааччыта Евдокия Захарова быйылгыттан саха ынаҕын төбөтүн элбэтэр былааннааҕа. Тыа хаһаайыстыбатын министиэристибэтиттэн бу салааны сайыннарарыгар кини анал грант ылбыта.
Дьаһалта баһылыга бэлиэтииринэн, бу быһа холуйан ааҕыы чахчы. Бу күннэргэ дьаһалта иһинэн тэриллибит хамыыһыйа халаан таһаарбыт хоромньутун ааҕан-суоттаан, тустаах докумуоннары толоруутун салгыы ыытар.
Өймөкөөн нэһилиэгэр тахсыбыт халаан Томтору кытта сибээстиир айан суолун үс муостатын улахан уу илдьэ барда. Нэһилиэк дьаһалтатын баһылыга Павел Васильев 400 тыһ. солк. суумаҕа туттарбыт улахан муостабыт кытта ууга баран, айан суолугар улахан уустуктар үөскээтилэр диэн иһитиннэрэр.
Улуус дьаһалтатын баһылыга Михаил Захаров бу күннэргэ өрспүүбүлүкэтээҕи таһымнаах ыксаллаах быһыы-майгы министиэристибэтин хамыыһайата мунньахтаабытын түмүгэр бүгүн Өймөкөөҥҥө министиэристибэ территориальнай органын салайааччытын солбуйааччы Аркадий Саввинов тиийэн, балаһыанньаны миэстэтигэр кэлэн билсэ сылдьар диэн иһитиннэрдэ. Онон өймөкөөннөр: «Ыарахан кэммитигэр өрөспүүбүлүкэбит салалтата биһигини өйөөн, санаабыт бөҕөргөөтө», — диэн истиҥ махталларын тиэрдэллэр.
Синоптиктар билгэлииллэринэн, сарсын-өйүүн Өймөкөөҥҥө инчэҕэй хаар түһэрэ сабаҕаланар. Онон уустук балаһыанньаҕа түбэспит улуус олохтоохторо бырабыытылыстыба бары өйөбүлү оҥоруо диэн улахан эрэллээхтэр.
