Тыа хаһаайыстыбатыгар кадр бэлиитикэтин туһунан Ил Дархан ыйааҕа, Саха судаарыстыбаннай тыа хаһаайыстыбатын академиятын сайдыытыгар олук буолуоҕа. Ол туһунан үөрэх кыһатын ректора Иван Слепцов эттэ.
Бэлиэтээн этэр буоллахха, бу нэдиэлэҕэ Егор Борисов таһаарбыт ыйааҕар олоҕуран, өрөспүүбүлүкэ 2030 сылга диэри тохтоло суох аграрнай үөрэхтээһин систиэмэтин оҥоруохтаах. Лицензия биэрэр уонна квалификацияны үрдэтэр кииннэр тэриллиэхтээхтэр, араас куонкурустар ыытыллыахтаахтар уонна да атын тэрээһиннэр киирэллэр.
Иван Слепцов Ил Дархан санаатын кытта сөпсөһөрүн биллэрэр, билигин чахчы ыччат тыа сиригэр үлэни соччо-бачча сыаналаабат, тоҕо диэтэххэ бу хайысханы муодунайа суоҕунан ааҕар. Кини өскөтүн тыа хаһаайыстыбатын исписэлиистэрэ стажировкалары ааһар, аныгы оборудованиеларга үлэлиир, Россия таһымнаах куонкурустарга кыттар буоллахтарына, ити өйдөбүллэрэ суох симэлийэригэр эрэллээх.
«Биир холобуру аҕалыам. Хаҥалас улууһугар «Бөртө» ХЭУо баазатыгар үөрэтии былаһаакката тутуллар. Манна араас практическай үөрэхтэр уонна лекциялар ыытыллыахтара. Биһиги итиннэ бэйэбит эрэ устудьуоннарбытын буолбакка, уопут атастаһар туһуттан, бу хайысханан үлэлии сылдьар исписэлиистэргэ эмиэ сыһыарыахпыт«, — диир ректор.
Фермер диэн, Слепцов этэринэн, «крутой» киһи: «Кини барытын билиэхтээх: оҥорон таһаарыыны, механизацияны, маркетины. Бу киэҥ хабааннаах толкуйдаах, билиилээх, судаарыстыбаҕа олус наадалаах киһи. Ону судаарыстыба эмиэ билэр, өйдүүр. Тыа хаһаайыстыбатыгар сыһыаннаах ханнык баҕарар көҕүлээһин бүгүн өрөспүүбүлүкэ былааһын өттүттэн улахан күүстээх материальнай өйөбүлү ылар«.
«Бэйэҕит толкуйдаан көрүҥ: эдэр исписэлиис оройуоҥҥа үлэлии барар, тута кини хамнаһыгар өрөспүүбүлүкэ дотация оҥорор: киин улуустарга — 10 000, хотугу эргимтэҕэ — 15 000 солк. Дьиэ туттарыгар бэриллэр субсидия быһа холоон 700 тыһ.солк. тэҥ. Сир учаастага үгүс сиргэ босхо бэриллэр. Бу барыта эдэр исписэлиискэ олус үчүгэй тирэҕи оҥорор. Бу туһунан биһиги куруук уонна элбэхтик кэпсиэхпитин наада«, — диэтэ Иван Слепцов.
