Бэнидиэнньик үүнэр түүнүгэр Дьокуускай Лермонтов аатынан уулуссатыгар суолга улахан быһылаан таҕыста. Ити түмүгэр 20-25 саастаах кыыс уонна 24 саастаах эдэр киһи олохторо быһынна.
«Мерседес» массыына Лермонтов-Петр Алексеев аатынан уулуссалар быһа охсуһууларын ааһан баран утары суолга тахсан биэрэн «Тойота Чайзер» массыынаны кытта харсыста уонна «Чайзер» кэнниттэн айаннаан испит «Тойота Порте» массыынаҕа тиийэн түстэ. Күүстээх охсууттан «Тойота Чайзер» «Тойота Ист» массыынаҕа тиийэн түстэ», — диэн суол инспектордара эттилэр.
Быһылаан түмүгэр «Тойота Чайзер» тимир өрөһөтүгэр кубулуйда. 24 саастаах кыыс өлүгүн быһааччылар анал инструменнарынан хостоотулар. «Мерседес» суоппара уонна манна олорсон испит киһи чэпчэкитик эчэйдилэр.
Чинчийэн быһаарыы кэнниттэн биллибитинэн, быһылааны таһаарбыт суоппар итирик туруктаах массыына уруулугар олорбут. Быһылаан хайдах тахсыбытын өйдөөбөт. СИА-ҕа биллибитинэн, кини Кангаласс бөһүөлэгин оскуолатын дириэктэрэ.
Быһылаан холуобунай дьыала тэриллэригэр силиэстийэлиир уорганнарга бэрилиннэ. Массыынаны итирик ыытыы, суол быһылааныгар икки уонна онтон элбэх киһини сэрэҕэ суохтан өлөрүү иһин 4-9 сылга диэри көҥүл хаарчахтаныан сөп. Ону таһынан дуоһунастан үс сылга диэри тохтотуллар.
«Тойота Чайзер» массыынаҕа олорсон испит кыыс кимэ билигин биллэ илик. Быһылааны көрбүт дьон маннык төлөпүөннэринэн эрийэргитигэр: силиэдэбэтэллэр — 8914-228-53-51, 8924-769-14-89; автоинспекция дьуһуурунай чааһа – 127.
