Арыгы иһэн баран, халлаан хабарҕатынан, муора тобугунан буолбут дьон полиция үлэһиттэригэр, ордук чуолаан, дьону кытта быһаччы үлэлиир сотрудниктарга (ППС, ДПС, ОВО) өрөлөһүүлэрэ, бэл диэтэр, саба түһүүлэрэ күннэтэ тахсара буолуо эрээри, онтон сорох эрэ түбэлтэлэригэр дьыала тэриллэр буолуохтаах.
Үксүгэр, оннук кэбилэммит киһи сарсыныгар өйдөнөн баран, тугу оҥорбутун дьэ өйдөөн, кэмсиммитин-кэмириммитин да иһин, дьыала номнуо тэрилиннэҕэ, сокуон иннигэр эппиэттииригэр эрэ тиийэр.
Оннук «хорсун» эр дьонтон дьахтар аймах да хаалсыбат. Биир оннук дьахтарга холуобунай дьыала тэриллибитин туһунан РФ Силиэстийэлиир кэмитиэтин Саха сиринээҕи управлениета иһитиннэрдэ.
Силиэстийэ уорганнара Дьокуускай куорат 32 саастаах олохтооҕор РФ Холуобунай кодексатын 318-с ыст. 1 чааһынан, ол эбэтэр, былаас бэрэстэбиитэлигэр күүһү туттуу бэлиэтэ баарынан, холуобунай дьыала тэрийдилэр.
Силиэстийэ сабаҕалыырынан, бу эдэр дьахтар 2017 сыл муус устар 19 күнүн түүнүгэр массыынатын итирик туруктаах ыыта сылдьан, ГИБДД иниспиэктэрдэригэр түбэспит. Киин куорат Лермонтов уулуссатын 58/1 нүөмэрдээх дьиэтин таһыгар.
Онно быһаарсыы кэмигэр биллибитинэн, дьахтар кулун тутар ыйга, ол аата ити түбэһиэн биир ый иннинэ, эмиэ уруулга арыгы иһэн баран олорон, массыына ыытар бырааба быһыллыбыт эбит.
Бу иккистээн түбэһиитигэр, полиция массыынатыгар олорон, иниспиэктэр административнай боротокуол толорор кэмигэр кинини сутуругунан иккитэ сирэйгэ охсубут уонна массыынаттан куотан тахсыбыт.
Онуоха иккис иниспиэктэр тутаары гыммытыгар, кинини сирэйин хайа тардыбыт.
Бу ыстатыйанан «бойобуой» дьахтар биэс сылга диэри көҥүлэ быһыллыан сөп.
