Дойду историятыгар көрдөххө, судаарыстыба сайдыытын ол кэминээҕи баар усулуобуйатыгар олоҕуран, Конституцияҕа көннөрүүлэр киллэриллэллэр. Бу туһунан ХИФУ историяҕа факультетын доцена Айтал Яковлев этэр, диэн СИА суруйар.
«Мин историк уонна көннөрү киһи быһыытынан эппиэттиэм. Россия бастакы Конституциятынан 1905 сыллаахха ылыллыбыт манифеһы ааттыахха сөп. Оттон Сэбиэскэй союз конституциялара. Хас биирдии конституция уонна онно көннөрүүлэри киллэрии — киһи сыаннастарын, социальнай мэктиэни өрө тутуу, бигэ туруктаах судаарыстыбаннай былааһы олохтооһун буолар», — диэтэ Айтал Яковлев.
Кини эппитинэн, ханнык баҕарар уопсастыбаҕа дириҥник үөскээбит кыһалҕа син-биир баар, ону туоратыыга үлэ барыахтаах, экономическай уонна социальнай боппуруостарга хоруй баар буолуохтаах. Манна сүрүн «компаһынан» хас биирдии киһи өйө-санаата уонна судаарыстыба Төрүт сокуона олук буолаллар.
«Ким да бу идеальнай докумуон диэ суоҕа. Юрист кэллиэгэлэрим миигин кытта сөбүлэһиэхтэрэ дии саныыбын — дьиҥнээх олоххо сөп түбэһэр уонна онон сирдэтинэн чуолкайдык чочуллубут быраап докумуона диэн суох. Ол иһин бэлиитиктэр, юристар, парламент, публичнай былаас уоргана үлэлииллэр – олох быраабылалара сөпкө үлэлииллэригэр, сокуоннар уонна быраап акталара гуманистическай сыаннастарга чугас буолалларыгар, бэйэ-бэйэлэрин утарсыбаттарыгар», — диэтэ историк.
Чуолаан Конституция көннөрүүлэрин туһунан этэригэр, кинини тыл уонна РФ территориятыгар олорор норуоттар бэйэ-бэйэлэригэр сыһыаннарыгар аналлаах боппуруостар интэриэһиргэтэллэрин эттэ.
