Үлэ уонна социальнай көмүскэл министиэристибэтэ муҥутуур бэлэм эрэһиимигэр үлэлиир. Биэдэмистибэ пресс-сулууспата СИА-ҕа иһитиннэрбитинэн, реабилитацияны ааһааччыларга уонна интернат олохтоохторугар сынньалаҥнара сөпкө тэриллэр.
«Интернат дьиэлэргэ саастаах дьон олорор, социальнай реабилитациялыыр кииннэргэ оҕолор бааллар. Ол иһин харантыыҥҥа көспүппүт. Доруобуйаларын туругун бэрэбиэркэлээһин тохтоло суох ыытыллар уонна дьуһуурустуба олохтонно», — диэн миниистир бастакы солбуйааччыта Иван Алексеев эттэ.
Олохтоохтор мааскалаахтар, быраас сотору-сотору көрөр.
«Саастаах дьону кытта үлэлиирбит быһыытынан муҥутуур бэлэм эрэһиимэ олохтонно. Чуолаан, кинилэргэ коронавирус кутталлааҕа бэлиэтэнэр. Биһиги сорукпут — ыарыы кинилэр туруктарын таарыйбатыгар», — министиэристибэҕэ эттилэр.
Иван Алексеев эппитинэн, тэрилтэлэргэ сынньалаҥнара сөпкө тэриллэр.
«Сынньатар-аралдьытар тэрээһиннэри төһө кыалларынан ыыта сатыахтаахпыт. Балаһыанньаны өйдөөн, министиэристибэ саҥа информационнай технологиялары туһанар. Ол курдук, виртуальнай музейдар, кинотеатрдар уонна да атыттар. Биллэн турар, интернат уонна киин олохтоохторо куруук медицина уонна социальнай үлэһит кэтээн көрүүтүгэр сылдьаллар», — диэтэ кини.
