От ыйын 8-15 күннэригэр Дьокуускайга Норуоттар икки ардыларынааҕы аан маҥнайгы Интеллектуальнай оонньуулар ыытыллыахтара. Тэрээһиҥҥэ барыта 1410 оҕо кыттыаҕа.
СӨ Үөрэҕин уонна наукатын министиэристибэтин пресс-сулууспата иһитиннэрбитинэн, Оонньууларга, уопсайа, 1410 оҕо кыттара биллэр. 16 тас дойдуттан 470 киһи кэлиэ диэн сабаҕалыыллар. Бүгүҥҥүтэ, кыттааччылар испииһэктэрэ оҥоһулла сылдьар. Сайаапканы ыам ыйын 16 күнүгэр диэри ылаллар.
Саха сирин историятыгар киирэр бастакы Интеллектуальнай оонньуу түөрт сиринэн ыытыллыаҕа. Ол курдук, Хотугулуу-Илиҥҥи федеральнай университет Кылаабынай үөрэтэр куорпуһугар (ГУК), Естественнэй наукалар куорпустарыгар (КФЕН), Өрөспүүбүлүкэтээҕи лиссиэй-интэринээккэ, “Триумф” спортсменнары бэлэмниир кииҥҥэ буолуоҕа.
Кыттааччылары “Тыгын Дархан”, “Полярнай звезда” гостиницаларга уонна устудьуоннар куораттарыгар түһэриэхтэрэ.
Санатан эттэххэ, Интеллектуальнай оонньуу сүрүн сыалынан кыра саастарыттан научнай чинчийиинэн дьарыктанар талааннаах, дьоҕурдаах, науканы, тиэхиньикэни, технологияны сэҥээрэр оҕолор сайдалларыгар тохтобула суох үлэлиир коммуникационнай-үөрэтэр былаһаакканы тэрийии буолар.
Оонньуу сүрүн куонкурустаһар тэрээһинэ олимпиаднай, бырайыактыыр уонна чинчийэр үлэлэртэн турар. Оттон куонкуруһу таһынан бырагыраамаҕа оҕо медийнэй научнай оскуолатын; үөрэнээччилэр научнай-чинчийэр үлэлэрин быыстапкатын; наука, култуура, урбаан, бэлиитикэ биллэр-көстөр диэйэтэллэрин лиэксийэлэрин; биллиилээх учуонайдар маастар-кылаастарын; технологическай шоуну; научнай-практическай симпозиуму, араас тиэмэлээх “төгүрүк остуоллары” былаанныыллар.
