29 Кулун тутар 29.03
  • -10°
  • $ 92,26
  • 99,71

Индигир үлэһит ыалыгар Слепцовтарга олохтоохтор махтаналлар

18:57, 12 декабря 2018
Текст:
Читайте нас на
Яндекс Новости
ЯДВ

Индигир нэһилиэгэр Иннокентий Слепцов биир тутаах үлэһитинэн биллэр. Кини хаһыс да сылын бэйэтин массыынатынан чааһынай ыалга муус ылан тиэйэр. 


«Үлэ киһини киэргэтэр» диэн этии Индигир нэһилиэгин олохтооҕор Иннокентий Дмитриевичка туһуламмыт курдук. Биир дойдулаахтара ыраас муус уутунан хааччыллан олороллоругар киниэхэ үтүө махтал тылын аныыллар. Ону таһынан, сүөһүлээх дьон күһүн аайы отун тиэйэн биэрэр эмиэ кини. «Бу массыынабыт суоҕа буоллар, оппутун хайдах тиэниэхпит этэй, — дэһэллэр нэһилиэк олохтоохторо. — Сыаната да чэпчэки. Биир да салаа от түспэт гына сиэккэлээн уурар, олус тупсаҕайдык ууран тиэйэрэ үөрдэр.»

Иннокентий Дмитриевич оҕо эрдэҕиттэн үлэҕэ үөрүйэх буолан, ити курдук от, муус, мас тиэйиитигэр көмөлөһөн, дьон махтала улахан. Оттон массыынатын көрөн-истэн илдьэ сылдьарыгар тэҥнээҕэ аҕыйах. Ардыгар уола Леонид Иннокентьевич көмөлөһөр. Дьиэ кэргэн далбар хотуна Александра Егоровна нэһилиэк туһа диэн сүүрэр-көтөр, араас тэрээһиннэргэ кыттар. Дьаһалтаҕа үлэлиир буолан, ыраахтан-чугастан ыалдьыттары көрсүү, атаарыы кинитэ суох ааспат.

Дьиэ кэргэн аҕа көлүөнэ дьоно ытыктабыллаах Дмитрий Иннокентьевич, Анна Афанасьевна эмиэ болҕомтоҕо, көрүүгэ наадыйаллар. Сүөһү иитэллэр, ол көрүүтэ, отун-уутун хааччыйыы үлэтэ элбэх. Итини барытын кыайа-хото тутан Иннокентийдаах Александра нэһилиэк биир дьоһун-ытык ыала  ааттанан, үлэҕэ, дьоҥҥо сыһыан үтүө холобурун көрдөрөллөр.

Ааптар: Анна ВАСИЛЬЕВА.

Следите за самым важным и интересным в Telegram-канале и WhatsApp-группе ЯСИА