Бэҕэһээ Ил Дархан Егор Борисов Уһук Илин регионнарга инвестиционнай бырайыактары киллэриигэ туһуламмыт РФ бырабыыталыстыбатын анал хамыыһыйатыгар Саха сиригэр тутуллуохтаах социальнай эбийиэктэри көмүскээтэ.
Мунньаҕы вице-премьер-Уһук Илин регионнарга РФ президенин боломуочуйалааҕа Юрий Трутнев иилээн-саҕалаан ыытта. Юрий Петрович бэлиэтээбитинэн, Уһук Илин регионнар социальнай-экономическай сайдыыларыгар 2018-2020 сс. 55,6 млрд солк. көрүллүөхтээх. Туһааннаах бырагырааманан 88 социальнай саҥа эбийиэк олоххо киириэхтээх. Ону таһынан 23 тутууну саҥардан биэриэхтээхтэр. Уопсайа 196 эбийиэк тутуллуохтаах. Санатан эттэххэ, РФ президенэ Владимир Путин промышленнай эрэ эбийиэктэринэн муҥурдаммакка, нэһилиэнньэ олорор усулуобуйатын тупсарыы барыахтааҕын туһунан эрдэ этэн турар. Ол иһин билигин промышленность ханна сайдар да онно социальнай эбийиэктэр тутуллуохтаахтар.
Онон бу бырагырааманан промышленнай оройуоннарбытыгар уонна Дьокуускай куоракка сүрүннээн тутуулар барыахтара. Бэлиэтээн эттэххэ, Саха сирин экономическай сайдыыта түөрт хайысхаҕа араарыллан турар: Дьокуускай уонна куорат таһыгар баар нэһилиэнньэлээх пууннар, соҕуруу – Нерюнгри, Алдан, арҕаа – Ленскэй, Мирнэй, илин – сиртэн хостонор баайдаах улуустар уонна Саха сирин хотугу тирэх зонатыгар киирбит Тиксии, Депутатскай.
Анал хамыыһыйа мунньахтыан иннинэ Егор Борисов Юрий Трутневы кытары көрсүбүтэ. Онно кини, бастатан туран, “Соҕуруу Саха сирэ” урутаан сайдар сиргэ социальнай эбийиэктэри, Дьокуускайга искэҥ, сүрэх ыарыыларын эмтиир диспансердар тутууларын, хаарбах оскуолалары саҥардыы, о.д.а. тустарынан кэпсэппитэ. Ону сэргэ бу былаанынан орто, анал үөрэхтээһин эбийиэктэрин (Дьокуускайга, Өлүөхүмэҕэ, Мирнэйгэ, Алдаҥҥа, Нерюнгрига, Жатайга) материальнай-техническэй базаларын хаҥатыы, Нерюнгри, Чульман коммунальнай хаһаайыстыбаларын ситимини саҥардыы, “биир гектар” бырагырааманан Амма Булуҥар, Мэҥэ Хаҥалас Аллараа Бэстээҕэр, Ньурба Антоновкатыгар инфраструктураны тутуу барыахтааҕын туһунан эппитэ.
Оттон оскуолалар чаастарын ыллахха, быйыл Дьокуускай куорат 23 кыбаарталыгар 35-с нүөмэрдээх оскуола тутуута саҕаланыахтаах. Кэлэр үс сылга Томпотооҕу гимназия, Орто Халымаҕа спортивнай саала тутуллуохтаах.
Юрий Трутнев бу ылыныллыбыт былаан үс сыл иһигэр, 2020 сыл түмүктэниэр диэри, толоруллуохтааҕын эттэ.
Егор Борисов мунньах түмүгэр бу маннык социальнай тутуулары туруорсуу олус уустугун, туһааннаах министиэристибэлэр, биэдэмистибэлэр бу маны толорууга күүскэ ылсыахтаахтарын бэлиэтээн туран: “Уһук Илин регионнарга социальнай эбийиэктэри тутууга, социальнай инфраструктураны саҥардыыга президент Владимир Путин туруорбут сыалын-соругун толоруу туһунан кэпсэттибит. Бүддьүөттэн үбүлэнии чааһын күүскэ туруорсуохха, бырайыактарбытын көмүскүөххэ наада этэ. Мин санаабар, Саха сирин дэлэгээссийэтэ ити түһүмэхтэри ситиһиилээхтик аастыбыт, үгүс бырайыактарбытыгар сөпсөһүүнү номнуо ыллыбыт. Аны билигин 2-3 нэдиэлэ устата хаалбыт боппуруостарбытын кэпсэтиэхпитин наада”, — диэн этэр.
