Ил Дархан Айсен Николаев норуот иннигэр аһаҕас кэпсэтиигэ кыттыбытын «күөх экран» нөҥүө мэҥэ хаҥаластар көрдүбүт-иһиттибит. Улууска ыччат дьыалаларыгар уонна дьиэ кэргэн бэлиитикэтигэр управление исписэлииһэ Василий Филиппов аныгы технологиялар тустарынан Айсен Николаев этиитин биһириирин эттэ.
Мэҥэ Хаҥалас улууһун сирэ-уота саамай кыра иэннээҕинэн биллэр. Ити эрээри манна нэһилиэнньэтин ахсаана элбэх. Эдэр дьон үөрэхтэрин бүтэрэн, төрөөбүт түөлбэлэрин сайыннарыыга төннөн тиийэн үлэлииллэр. Ыччат дьыалаларыгар уонна дьиэ кэргэн бэлиитикэтигэр управление исписэлииһэ Василий Филиппов аныгы технологиялар тустарынан Айсен Николаев этиитин биһириирин эттэ.
‒ Инники олохпут барыта аныгы технологиялары кытта ыкса сибээстээх буолара биллэр. Туох баар олохпут-дьаһахпыт, үлэбит, үөрэхпит барыта сибээһи кытта ситимнээх буолла. Онон Ил Дархан саҥа технологиялары сайыннарыыга болҕомто уурбутун сэргээтим. Биһиги өрөспүүбүлүкэбит төһө да ыраах хоту дойдуга сыттар, технологиялары сайыннарыыга олох хаамыытынан тэҥҥэ сайдан иһэрбит олус үчүгэй дии саныыбын. Ыччаттарбыт бу хайысхаҕа ылсан иһэллэрэ даҕаны үөрдэр.
Кэнники кэмҥэ Аллараа Бэстээхтээҕи Тырааныспар техникумун бүтэрэн, тимир суол эйгэтигэр олохтоох ыччат үлэһит буолуута ‒ сайдыы биир көрүҥэ. Онон эдэр дьон тырааныспар, тиэхиньикэ, бырамыысыланнас эйгэтигэр үлэлииллэрэ билигин олус наадалаах. Айсен Сергеевич бырамыысыланнаһы сайыннарыыны инники күөҥҥэ тутар наадалаҕын ыйарыгар сөбүлэһэбин диир Мэҥэ Хаҥалас ыччатын лидерэ.
«Өлүөнэ өрүһү туоруур муоста тутулуннаҕына, биһиги эрэ улууспут дьоно буолбакка, бүтүн өрөспүүбүлүкэ олохтоохторо абыраныах этибит. Күһүн, саас кэлэргэ-барарга харгыс суох буолуо этэ. Ил Дархаммыт Айсен Николаев ыытар үлэтин өйөөн, өрөспүүбүлүкэбит тупсарын туһугар түмсүөҕүҥ диэн ыҥырабын«, — диэтэ кини.
Ааптар: Виктория БЕЛОЛЮБСКАЯ.
This post was published on 20.11.2018 18:14 18:14