Күндү Далбар хотуттар! Өрөспүүбүлүкэ салалтатын уонна тус бэйэм ааппыттан эһигини сааскы сырдык бырааһынньыгынан – Аан дойду дьахталларын күнүнэн итиитик-истиҥник эҕэрдэлиибин!
Томороон тымныылаах хотугу кыраайбыт кырыа кыһына саас кэлбитин кэрэһилиир кулун тутар 8 күнүн көрсө иһийэргэ дылы гынар. Бу кэрэ-бэлиэ бырааһынньык сааскы күн бастакы сылаас сардаҥаларын, сырдык мичээри, үлүскэн үөрүүнү бэлэхтиир.
Былыр-былыргыттан дьахтар алаһа дьиэни иччилиир аналлааҕын бэлиэтииллэрэ. Аныгы олоххо дьахтар бу үрдүк аналыгар саҥа социальнай оруол эбиллэр. Бүгүн кэрэ аҥаардар дьыалабыай, профессиональнай хаачыстыбаларынан сөхтөрөллөр, өрөспүүбүлүкэ социальнай-экономическай олоҕор көхтөөхтүк кытталлар. Үөрэх, доруобуйа харыстабылын, социальнай хааччыйыы, тыа хаһаайыстыбатын, эргиэн, экономика онтон да атын эйгэтин сайдыытыгар дьахтар дьоһун кылааты киллэрэр.
Биһиги өрөспүүбүлүкэбитигэр дьахтарга, дьиэ кэргэн институтугар, ийэ буолууну уонна оҕо сааһы араҥаччылыыр үлэҕэ-хамнаска, дьиэ кэргэн судаарыстыбаттан көдьүүстээх көмөнү ыларын туһугар тумус суолталаах социальнай бэлиитикэни торумнуурга дьоһун болҕомто ууруллан кэллэ.
Күндү Далбар хотуттар! Бу сырдык сааскы күн эһиги дьиэ кэргэҥҥитигэр иллээх олоҕу, уйгуну, үлэҕэ-хамнаска ситиһиини, чэгиэн доруобуйаны уонна тапталы баҕарабын.
Саха Өрөспүүбүлүкэтин Ил Дархана Айсен Николаев
