Егор Борисов оҕо дьоҕурун арыйар уонна сайыннарар тиһиги тупсарар итиэннэ наука, тиэхиньикэ, култуура, ускуустуба, спорт эйгэтигэр ураты дьоҕурдарын көрдөрбүт үөрэнээччилэри судаарыстыба өттүттэн өйөөһүнү күүһүрдэр сыалтан «Саха Өрөспүүбүлүкэтигэр ураты дьоҕурдаах оҕолору таһаарыыга, өйөөһүҥҥэ кэлим дьаһаллар тустарынан» ыйаахха илии баттаата, диэн edersaas.ru иһитиннэрэр.
Судаарыстыбаннай үөрэх тэрилтэлэрин «Ил Дархан» ситимигэр өрөспүүбүлүкэҕэ бары көрдөрүүлэринэн инники күөҥҥэ сылдьар итиэннэ ураты дьоҕурдаах оҕолору кытары таһаарыылаахтык үлэлиир уопсай үөрэхтээһин оскуолалара, эбии үөрэхтээһин тэрилтэлэрэ, музыкальнай уонна спортивнай оскуолалар киллэриллиэхтэрэ. Ситим методическай киининэн Саха өрөспүүбүлүкэтин Наукаларын дьоҕус академията буолуоҕа.
Егор Борисов маны сэргэ Россия стандартынан эрэ буолбакка, бакавлариат аан дойдутааҕы бырагырааматынан үлэлиэхтээх уопсай үөрэхтээһин өрөспүүбүлүкэтээҕи тэрилтэтин – Арктика аан дойдутааҕы оскуолатын тэрийэргэ эттэ. Онон, 2019 сыл балаҕан ыйын 1 күнүгэр бу оскуола дьиэтэ үлэҕэ киирэригэр үөрэх бырагыраамата оҥоһуллубут, иитэр-үөрэтэр каадырдар сүүмэрдэммит буолуохтаахтар. Билигин онно бэлэмнэнэн, «Арктика аан дойдутааҕы оскуолата» бырайыагы оҥорор офис үлэлиир.
Наука, тиэхиньикэ, култуура, ускуустуба, спорт эйгэтигэр ураты дьоҕурдарын көрдөрбүт итиэннэ аан дойду таһымнаах дьаһалларга, бырайыактарга кыттыбыт оҕолору өйүүр «Саха сирин эдэр талааннара» анал пуонда тэриллиэҕэ. Өрөспүүбүлүкэ бары биэдэмистибэлэрэ уонна тэрилтэлэрэ пуонда тэриллиитигэр кыттыыны ылыахтара.
Хаҥалас улууһун Чапаево сэлиэнньэтигэр былааннанар 150 үөрэнээччигэ анаммыт, 100 миэстэлээх интэринээттээх өрөспүүбүлүкэ Наукаларын дьоҕус академиятын үөрэтэр-лабораторнай куорпуһун тутуу итиэннэ «Арктика оҕолоро» аан дойдутааҕы киин эбийиэктэрин, ол иһигэр Дьокуускайга оҕо технопааркатын тутуу «Кэлэр кэм аатыгар» бырагыраамаҕа киллэриллиэхтэрэ. «Саха сирин дьоҕурдаах оҕолоро 2018-2023 сс.» кэлим бырагыраама оҥоһуллан, 2017 сыл ахсынньы 1 күнүгэр диэри бигэргэниэҕэ.
Министиэристибэлэр уонна биэдэмистибэлэр наука, тиэхиньикэ, култуура, ускуустуба, спорт эйгэтигэр ураты дьоҕурдаах оҕолору булан таһаарар, өйүүр дьаһаллары уонна тэрийиэхтэрэ. Бу үлэҕэ улуустар эмиэ тардыллыахтара, тус сыаллаах муниципальнай бырагыраамалары ырытан оҥорор туһунан ыйаахха анал пуун баар. Улуустар дьаһалталара уопсай уонна эбии үөрэхтээһин тэрилтэлэрин материальнай-техническэй базаларын дьоҕурдаах оҕолору кытары үлэлииргэ сөп түбэһиннэрэн оҥоруохтара.
Ил Дархан саҥа ыйааҕа оҕо дьоҕурун арыйыыга, сайыннарыыга туһуламмыт Концепция үлэтигэр улахан төһүү буолуоҕа.
