Саха сирин Аҕа баһылыга Егор Борисов от ыйын 7 күнүгэр Норуоттар икки ардыларынааҕы саахымат федерациятын президенэ, Калмыкия бастакы баһылыга Кирсан Илюмжиновы кытта көрүстэ. Өрөспүүбүлүкэ салайааччыта региоҥҥа сүрүн хайысхалар уонна тирээн турар балаһыанньа туһунан билиһиннэрдэ.
«Саха сирэ — Российскай федерацияҕа саамай бөдөҥ эрэ буолбакка, саамай сөптөөхтүк сайдан иһэр субъегынан буолар. Манна 956 тыһыынча киһи олорор, сүүстэн тахса этнос баар. Экономика төрүтүн алмаас, кыһыл көмүс, полиметалл хостооһуна оҥорор. Кэнники кэмҥэ манна ньиэп бырамыысыланнаһа холбосто. Төрүт олохтоох норуот үксэ тыа сиригэр олорорунан, тыа хаһаайыстыбатыгар болҕомто ууруллар. Социальнай бэлиитикэ сүрүн миэстэни ылар — кыамматтарга, элбэх оҕолоохторго аадырыстаах көмө, саахалланар кутталлаах дьиэттэн дьону көһөрүү», — диэтэ Егор Борисов.
Ил Дархан өрөспүүбүлүкэ общественнай-политическай олоҕуттан эмиэ сырдатта. Кини саамай сүрүн соругунан көхтөөх гражданскай уопсастыбаны тэрийии буоларын эттэ. Улахан болҕомто спорду өйөөһүҥҥэ уурулларын иһитиннэрдэ. «Өрөспүүбүлүкэҕэ спорт 60 көрүҥүн сайыннарабыт. Биһиги атлеттарбыт Россиятааҕы, норуоттар икки ардыларынааҕы, ол иһигэр Олимпиадаҕа, Паралимпиадаҕа кытталлар. Спортивнай объект биир киһиэхэ тиксэринэн лидердэр буолабыт», — диэн эттэ Ил Дархан.
Көрсүһүү кэмигэр өрүттэр бэлэх бэристилэр. Егор Афанасьевич Илюмжиновка үрүҥ көмүс кур, булт быһаҕа, «Азия оҕолоро» сувенирын бэлэхтээтэ. Оттон саахымат федерациятын президенэ саахымат биэрдэ.
