29 Кулун тутар 29.03
  • -14°
  • $ 92,26
  • 99,71

Ил Дархан Норуот сомоҕолоһуутун күнүнэн эҕэрдэлиир

10:01, 04 ноября 2020
Текст:
Читайте нас на
Яндекс Новости
ЯДВ

Күндү Саха сирин олохтоохторо! Саха Өрөспүүбүлүкэтин салалтатын аатыттан уонна тус бэйэм эһигини Россия биир сүрүн бырааһынньыгынан – Норуот сомоҕолоһуутун күнүнэн ис сүрэхпиттэн эҕэрдэлиибин!


Быйыл, Аҕа дойду Улуу сэриитигэр Кыайыы 75 сыллаах үбүлүөйүн бэлиэтиир сылбытыгар, Норуот сомоҕолоһуутун күнэ ураты суолталаах. Россия араас муннуктарыгар олорор бары омуктар бэрэстэбиитэллэрэ – биһиги эһээлэрбит, аҕаларбыт – биир киһи курдук адьырҕа фашиһы утары Ийэ дойдуну көмүскүүр кырыктаах кыргыһыыга туруммуттара. Норуот улуу сомоҕолоһуутун түмүгэр аҕа көлүөнэ сэрии кэнниттэн урусхалламмыт дойдуну чөлүгэр түһэрбитэ, сүдү промышленностаах индустриальнай дойдуну айан-тутан таһаарбыта.

2020 сыл Россия Федерациятыгар Умнуллубат Албан аат сылынан биллэриллибитэ. Норуот сомоҕолоһуутун күнүгэр биһиги Россия норуота биир сомоҕо буолан өстөөҕү кыайбытын, бары уустуктары туораан судаарыстыбаны бөҕөргөппүтүн кэрэһилиир дойдубут үгүс үйэлээх историятыгар ытыктабылбытын биллэрэбит. История чахчытынан, бу бырааһынньык XVII үйэ саҥатыгар буолбут быһыыны-майгыны кытта ыкса сибээстээх. Оччолорго, 1612 сыллаахха, тастан саба түспүт өстөөхтөртөн нуучча сирин көмүскүүргэ нэһилиэнньэ бары араҥата, бары норуоттар туруммуттара.
Бу бырааһынньык биһиэхэ сомоҕолоһуу дьоһун суолталааҕын уонна Россия олохтоохторо эдэр көлүөнэҕэ тиэрдиэхтээх баай үгэспитин санатар.

Элбэх омуктаах Саха сирэ модун Россия быстыбат сорҕото буолар. Түөрт үйэ тухары биһиги бырааттыы уонна доҕордуу сыһыаммытын харыстаан, дойду үрдүнэн биир санаанан уонна биир эрэлинэн олорон кэллибит, этэҥҥэ буолуу уонна кыайыы норуот күүһүн холбоотоххо ситиһиллэрин мэлдьи өйдүүбүт.

Саха сирэ судаарыстыбаны бөҕөргөтөргө уонна Россия уопсастыбатын сомоҕолуурга дьоһун кылааты киллэрэр. Салгыы бу курдук бары биир сомоҕо буоллахпытына өрөспүүбүлүкэбит, дойдубут чэчирии сайдарын туһугар туруоруммут бары сорукпутун толоруохпут диэн эрэнэбин.

Барыгытын Норуот сомоҕолоһуутун күнүнэн эҕэрдэлиибин! Ситиһиилэри уонна дьиэ кэргэҥҥит, төрөөбүт дойдугут уонна модун Россия туһугар айа-тута тураргытыгар баҕарабын!

Саха Өрөспүүбүлүкэтин Ил Дархана Айсен Николаев

Следите за самым важным и интересным в Telegram-канале и WhatsApp-группе ЯСИА