От ыйын 3 күнүгэр Айсен Николаев “Доруобуйа харыстабыла” уонна “Демография” национальнай бырайыактар тула мунньах ыытта. Ил Дархан үлэ хаамыыта хайдах баран иһэрин чопчулаата.


Бырабыыталыстыба бэрэссэдээтэлин солбуйааччы Ольга Балабкина 2020 сылга “Демография” бырайыакка уопсайа 6 млрд 680 млн солкуобай көрүллүбүтүн, онтон 5 млрд 612 млн федеральнай үп буоларын эттэ. Санатар буоллахха, өрөспүүбүлүкэҕэ “Демография” бырайыак биэс хайысханан үлэлиир.

«Дьахтар дьарыктаах буолуутугар көмөлөһүү – оҕону 3 сааһын туолуор диэри дьарыктааһын» диэн хайысха нөҥүө бу сылга Сунтаарга 240, Ньурбаҕа 280 миэстэлээх оҕо саадтара киирэллэрэ былааннанар. Маны таһынан Дьокуускай куоракка дьааһыла дьиэтигэр сөптөөх бэлэм эбийиэги көрдүөхтэрэ.

«Аҕа саас” хайысха чэрчитинэн икки утуйар корпус тутуута былааннанар. 150 миэстэлээх утуйар куорпус Бүлүү улууһун Сосновка нэһилиэгэр турар Бүлүүтээҕи психоневрологическай интэринээт-дьиэтигэр тутуллуо, 200 миэстэлээх куорпус Өлүөхүмэтээҕи кырдьаҕастары уонна инбэлииттэри көрөр дьиэҕэ.

«Спорт – олох сиэрэ» хайысханан сыл бүтүөр диэри Горнай улууһун Бэрдьигэстээх нэһилиэгэр элбэх функциялаах спортивнай саала уонна Мэҥэ-Хаҥалас Аллара Бэстээҕэр бассейннаах, дэгиттэр саалалаах спортивнай комплекс тутуллуохтара.

Тутуу министиэристибэтигэр Айсен Николаев социальнай эбийиэктэри ураты хонтуруолга ылалларыгар эттэ, эбийиэктэри ититии, уунан, малынан хааччыйыы курдук боппуруостары тургэнник быһааран иһэллэригэр сорудахтаата.

“Доруобуйа харыстабыла” национальнай бырайыак Саха сиригэр эмиэ биэс хайысханан үлэлиир. Баларга бу сылга уопсайа 7 млрд 970 млн солкуобай көрүллүбүт, онтон 3 млрд 557 млн солкуобайа — федеральнайдааҕы үп.

Доруобуйа харыстабылын миниистирэ Елена Борисова коронавирус инфекциятыттан сылтаан диспансеризацияны ааһыы, мобильнай медицинскай биригээдэлэр оройуоҥҥа, нэһилиэктэргэ тахсыылара, омук дьонун эмтиир былааннар туолбат кутталлаахтарын эттэ.

Түмүккэ Ил Дархан үлэ былаан быһыытынан баран иһэрин бэлиэтээтэ. Тустаах үлэһиттэр мантан антах хас биирдии боппуруоска болҕомтолоохтук, түргэнник ылсан үлэлииллэригэр эттэ. Бу туһунан СИА Ил Дархан уонна Бырабыыталыстыба пресс-сулууспатын иһитиннэриитинэн биллэрэр.

Сигэн:

0
0

Хоруй суох

Хоруйдаа

Лимит времени истёк. Пожалуйста, перезагрузите CAPTCHA.