Саха сиригэр коронавируһу тарҕаппат туһугар үлэ хонтуруолга тутуллар. Ол туһунан Ил Дархан Айсен Николаев Instagram сирэйигэр суруйда.
Регион салайааччыта коронавирус туһунан элбэх иһитиннэриини нэһилиэнньэттэн тутарын эттэ. «Бүгүҥҥү күҥҥэ коронавируһунан ыалдьыбыт киһи өрөспүүбүлүкэбитигэр суох. Суһал массыыналары уонна быраастары көрдөххүтүнэ уолуйууга киирэн биэримэҥ диэн көрдөһүөм этэ. Кинилэр инструкциянан ирдэбиллэри толороллор», — диэн санаатын тириэртэ.
Айсен Николаев Роспотребнадзор уонна РФ доруобуйа харыстабылыгар министиэристибэтин ирдэбиллэригэр олоҕурбут сэрэтэр үлэлэр өрөспүүбүлүкэ сиригэр-уотугар ыытылла туралларын иһитиннэрдэ.
«Сулууспалар Уһук Илинтэн уонна Сибииртэн кэлбит дьону булгуччу бэрэбиэркэлииллэр. Маны сэргэ Дьокуускай медтэрилтэлэригэр Кытайтан уонна соҕуруулуу-илиҥҥи Азияҕа сылдьыбыттар, ОРВИ сибикилээхтэр бэрэбиэркэлэнэллэр», – диэн бэлиэтээтэ баһылык.
