Пандемия кэмигэр дьон доруобуйата туруктаах буоларыгар хас биирдии киһиттэн эпппиэтинэс ирдэнэр, диэн Айсен Николаев коронавирус дьаҥа тарҕамматын туһугар нэһилиэнньэҕэ ыҥырыытын кэмигэр эттэ.
Саха сирин баһылыга Айсен Николаев медицина үлэһиттэрэ муҥутуур кыахтарынан сэттис ыйдарын үлэлииллэрин эттэ.
«Билигин ыарыы эбиллэн, эбии куойкалары астыбыт. 2000-тан тахса буолла. Онтон 70% туолан турар. Бу ыйдарга медицина ыарыыны кытта охсуһуута тубуста, стационардарга уонна амбулаторияларга ыарыһаҕы хайдах эмтиир боротокуоллар оҥоһулуннулар. Ити эрээри ыарыы эбиллэ турар чинчилээх. Ордук Дьокуускай куоракка. Онон доруобуйа харыстабылын эйгэтэ күүстээх ноҕуруусканы сүгэр», — диэтэ баһылык.
Ил Дархан бэлиэтээбитинэн, өрөспүүбүлүкэ бырааһын ахсаанын 40%-на коронавируһу эмтээһиҥҥэ сылдьар. Ити эрээри дьон атын ыарыынан ыалдьарын уонна бырааска наадыйыытын умнуо суохтаахпыт.
«Хомойуох иһин, коронавируһунан саастаах дьон ыалдьара элбэх. Ыарахан форманан. Кинилэр стационардарга уһуннук эмтэнэллэр. Реанимацияҕа сыталлар. 65-тэн аҕа саастаах дьоҥҥо самоизоляция эрэһиимэ олохтоммута, сорохтор ону умналлар», — диэтэ Айсен Николаев.
Саастаахтарга «больничнайдар» бэриллэллэр, дистанционнайдык үлэлииллэрэ көҥүллэнэр эбэтэр уоппускаҕа барыахтарын сөп. Самоизоляцияҕа олорооччуларга волонтердар көмөлөһөллөр. Саастаах дьоммут ыалдьыбаттарын туһугар баар миэрэни барытын тутуһуохтаахпыт — кинилэргэ сылдьыллыбат, бырааһынньыктар, үбүлүөйдэр тохтотуохтаахтар.
«Оҕолорго болҕомто ууруллар. Билигин үөрэх хаачыстыбатыгар уонна инфекция тарҕамматыгар туруулаһабыт. Хас биирдии оскуола, дьыссаат хонтуруолга ылыллар, ыалдьыбыт дьон ахсааныттан оҕо ыарыыта 8% тэҥ. Олохтоох бэйэни салайыныылар миэстэтигэр быһаарыы ылаллар. Оҕо ыалдьар түгэнигэр тута ирдэнэр дьаһаллар бары тутуһуллаллар», — диэтэ баһылык.
Салайааччы бэлиэтээбитинэн, былаас, оскуола уонна төрөппүт соруга — үөрэх тэрилтэлэригэр ыарыыны бохсуу, ол инниттэн баар санитарнай нуорманы тутуһуу.
