Ытыктабыллаах Саха сирин олохтоохторо! Саха Өрөспүүбүлүкэтин салалтатын уонна тус бэйэм ааппыттан эһигини Норуот сомоҕолоһуутун күнүнэн ис сүрэхпиттэн эҕэрдэлиибин!


Бу бырааһынньык биһиэхэ ураты суолталаах. Түөрт үйэ кэриҥэ Саха сиригэр олорор үгүс омук дьонун биир историческай дьылҕа ситимниир. Биһиги континент Хотугулуу Илиҥҥи өттүгэр Россия судаарыстыбатын инники кирбиигэ сылдьар регионунан буолбут Саха сирин үйэттэн үйэҕэ сайыннаран кэлбит хас эмэ көлүөнэ биир дойдулаахтарбыт үлэлэринэн уонна ситиһиилэринэн киэн туттабыт.

Норуот сомоҕолоһуутун күнүн биһиги саҥа ситиһиилээх көрсөбүт, киэҥ-нэлэмэн сирдээх-уоттаах өрөспүүбүлүкэбитигэр уларыйыы эрчимэ күүһүрэр. Саҥа суоллар тутуллаллар, дьону хаарбах дьиэттэн көһөрүү бырагырааматынан үлэ киэҥ далааһыннаахтык салҕанар, саҥа социальнай эбийиэктэр үлэҕэ киирэллэр, куораттар уонна бөһүөлэктэр тупсарыллаллар, промышленнай бырайыактар ситиhиилээхтик олоххо киирэн үтүө түмүктэри аҕалаллар.

Сомоҕолоһуу сылынан биллэриллибит 2019 сылга Саха сирин бары олохтоохторо бэйэлэрин үлэлэринэн уонна көҕүлээһиннэринэн инники сайдыыга олук ууран, өрөспүүбүлүкэбит чэчирии сайдарын туһугар кылааттарын киллэрэллэр. Бу үөрүүлээх күн Сахабыт сирин хас биирдии олохтооҕор биир сүбэнэн уонна доҕордуу сыһыанынан төрөөбүт дойдубут кэскилин түстүүргүт иhин дириҥ махталбын тиэрдэбин!

Биһиги өрөспүүбүлүкэбит чэчирии сайдар тирэҕинэн ил-эйэ, үтүө сиэр-майгы, бэйэ-бэйэҕэ ытыктабыллаах сыhыан буолар. Бүгүн биhигини барыбытын төрөөбүт Сахабыт сиригэр тапталбыт, ытыктабыллаах сыhыаммыт, инникигэ эрэлбит бииргэ түмэр, сомоҕолуур.

Бырааһынньыгынан, күндү доҕоттор! Норуот сомоҕолоһуутун күнүнэн! Ис сүрэхпиттэн хас биирдии дьиэ кэргэҥҥэ, алаһа дьиэҕэ үтүөнү, эйэни уонна сөбүлэһиини баҕарабын. Уйгулаах уонна дьоллоох буолуҥ, бары саҕалааһыҥҥыт ситиһиилэннин!

Саха Өрөспүүбүлүкэтин Ил Дархана Айсен Николаев

Сигэн:

0
0

Хоруй суох