Уһук Илин регион эдэр ыалларыгар 2%-наах чэпчэтиилээх ипотеканы киллэрии Саха Өрөспүүбүлүкэтигэр тутууну сэргэхситиэ диэн Айсен Николаев ТАСС биэриитигэр эттэ.


Президент Владимир Путин балаҕан ыйынааҕы экономическай форум кэмигэр Уһук Илиҥҥи региоҥҥа эдэр ыаллар 2%-наах чэпчэтиилээх ипотеканан туһаналларыгар программаны киллэрэр туһунан эппитэ. Дьаһал 2019 сылга саҕаланыахтаах. Бастакы түһүмэххэ эдэр ыаллар уонна «Уһук Илиҥҥи гектарынан» дьиэ туттааччылар киирсиэхтэрин сөп.

«2%-наах ипотека Саха сирин тутуутун эйгэтигэр сэргэхсийииини таһаарыа дии саныыбыт. Хампаанньалар бу быһаарыыны күүтэллэр. Салайааччылар программа хаһан саҕаланарын миигиттэн ыйыталаһаллар. Тоҕо диэтэххэ, үгүс эдэр ыал 5%-наах ипотеканан туһанаары сылдьан, тохтоон, саҥа дьаһалы күүтэллэр«, — диэтэ Айсен Николаев.

Кини Саха сирин тутуутун тэтимэ Уһук Илиҥҥи региоҥҥа бастакы миэстэҕэ турарын бэлиэтээтэ. Ол иһин тутар хампаанньаларга государствоттан анал өйөбүлгэ наадыйбаттар. Ити эрээри кыһалҕалар баалларын эмиэ санатта. «Ити эрээри сорох муниципалитеттарга административнай хааччахтар салҕанан бараллар. Кинилэр тутууга сөбүлэҥи биэриини көҕүлээһини күүһүрдүөхтэрин наада», — диэтэ Ил Дархан.

4
0
comments powered by HyperComments