Үстэн элбэх оҕолоох ыаллар өрөспүүбүлүкэтээҕи Ийэ хапытаалын ылар бырааптаахтар. Суумата – 139 716, 68 тыһ.солк.
2017 сыл ахсынньы 26 күнүгэр Егор Борисов анал укаас таһаарбыта. Ол чэрчитинэн, кэккэ уларыйыылар киирбиттэрэ.
Өрөспүүбүлүкэтээҕи Ийэ хапытаалын суумата икки төгүл үрдүөн сөп. Ол эрээри, онно хас да усулуобуйалаах. Бастатан туран, 2017 сыл ахсынньы 31 күнүгэр диэри үһүс (уонна онтон элбэх) оҕолорун төрөппүт (иитэ ылбыт) дьиэ кэргэттэр Ийэ хапытаалын ылан туһана илик буолуохтаахтар. Ону тэҥэ элбэх оҕолоохторго анаммыт сир учаастагыттан аккаастаныахтаахтар уонна бу хапытаалы олорор усулуобуйаларын тупсарыыга ыытыахтаахтар. Оччоҕуна, илиилэригэр 280 тыһ. кэриҥэ сууманы ылаллар. Бу суума бастакы усунуос быһыытынан, эбэтэр дьиэ туттарга, матырыйаал атыылаһарга төһүү күүс буолуон сөп. Эбэтэр ипотека кирэдьиитин бырыһыанын кыччатыахтарын сөп.
Маннык миэрэ суоллаах-иистээх, уоттаах-гаастаах сирдэргэ учаастактар тиийбэттэрин, аны туран, сир ыларга улахан уочарат баарын иһин ылылынна. Ону тэҥэ улуустарга олорор дьон бэйэлэрэ уһаайбалаах буолан, сир учаастагар соччо наадыйбаттар, арай, дьиэ туттарга туһаныахтарын баҕаралларын учуоттаабыттар.
Сир учаастагыттан аккаастанар сайабылыанньаны бэс ыйын 30 күнүгэр диэри суруйуохтаахтар. Бу күнтэн хойутаатахтарына, икки төгүл эбиллибит хапытаалы ылбаттар.
Ангелина Васильева, “Саха сирэ” хаһыат, edersaas.ru
