«Биһиги кэлэктииппит бары тэрээһини уратытык ыытарга кыһаллар. Маныаха сонун сүүрээни киллэрии, дьон-сэргэ өйүгэр-санаатыгар үчүгэйи-кэрэни, умнуллубаты иҥэрэргэ дьулуһуу биир сүрүн сорукпутунан буолар», — диэтэ колледж дириэктэрэ Захар Никитин.
Төрөөбүт тыл уонна сурук-бичик күнэ Дьокуускайдааҕы культура уонна искусство коллеһыгар дуорааннаахтык бэлиэтэннэ. «Иитиллибит ийэ тылбыт» диэн ааттаах тэрээһини колледж «Этно-художественнай дьоҕуру сайыннарар» салаатын преподавателлэрэ уонна устудьуоннар тэрийдилэр.
Бу кэтэһиилээх уонна ураты долгутуулаах күн дууһа кылын таарыйар умсулҕаннаах хоһооннору преподавателлэр, устудьуоннар ис дууһаларыттан иэйэн аахтылар. Оттон саалаҕа мустубут ыалдьыттар хас биирдии толорооччуну ис сүрэхтэриттэн астына истэн сүргэлэрэ улаханнык көтөҕүлүннэ. Бу киэһэ колледж директорын иитэр үлэҕэ солбуйааччы С.С.Шамаев, преподавателлэр: А.А.Алексеев, М.Н.Галактионова, А.С. Иванова, Р.А.Габышев, Г.А.Лыткина, С.Н.Федорова, А.А.Константинов, А.Н.Васильева уо.д.а. сыанаҕа тахсыылара дохсун ытыс тыаһынан доҕуһуолланна.
Маны сэргэ, дуорааннаах түһүлгэҕэ мустубут ыалдьыттар хамаандаларга арахсан викторинаҕа, куонкуруска көхтөөхтүк кытыннылар, төрөөбүт төрүт тылларын төһө билэллэрин бэрэбиэркэлэннилэр. Эрбии тииһин курдук тэҥ эриһии, сытыы киирсии кэнниттэн, «Уоланнар» хамаанда кыайыылааҕынан тахсан, үөрүү-көтүү өрөгөйүн туттулар. Дьоро киэһэ «Уран тыл уйата, хоhоон тыл хорооно» диэн куонкуруһунан түмүктэннэ. Хоһоону суруйарга холонуу күрэстэһиитигэр 40-тан тахса ыччат кыттыбытыттан, кыайыылаахтарынан бастакы куурус усутдьуоннара: Владимир Шамаев, Нарыйаана Винокурова, Айгылаан Аяров ааттаннылар.
