НВК САХА — Хаҥалас улууһун II Дьөппөн нэһилиэгэр саҥа бэтэринээринэй пуун дьиэтин туталлар. Бу үлэҕэ бэтэринээрдэр бэйэлэрэ эмиэ кыттыстылар.
Ол курдук, 50-с сылларга тутуллубут хаарбах туруктаах тымныы дьиэҕэ, бүтэһик кэмҥэ киһи үлэлиир усулуобуйата суох буолбут. Үлэһиттэр саҥа бэтэринээринэй дьиэ тутар туһунан туруорсууларын улуус салалтата өйөөн, үбүнэн, малынан көмөлөһүөх буолбут. Онтон олохтоох нэһилиэнньэ 20 эр киһитэ мас мастыырга көмөлөһөн, ааспыт сыл бүтүүтэ дьиэ холлоҕоһун туруорбуттара. Бу сайын үлэни сөргүтэн саҥа тутуу ис өттүн оҥоро сылдьаллар.
«Тутуу үлэтигэр бэйэбит көмөлөһөбүт, билигин икки маастар уол үлэлии сылдьар. Күн аайы үлэлиибит. Алтынньы ый саҥатыгар киирэргэ былааннанабыт. Дьиэ биир мэндиэмэннээх, уопсай иэнэ 54 квадратнай миэтэрэ,» — диэн нэһилиэк бэтэринээринэй пуунун сэбиэдиссэйэ Владислав Мартынов кэпсээтэ.
Источник: http://nvk-online.ru
This post was published on 05.09.2019 09:52 09:52