Игидэй оҕолорун ыра санаалара туолла

2018 сыл бүтүүтэ Таатта Игидэйигэр саҥа  оскуола үлэҕэ киирдэ. Кэлэктиип, оҕолор уһун сылларга күүппүт ыра санаалара туолла. Киэҥ-куоҥ, сырдык саҥа таас оскуолаҕа көһөн киирдилэр. Оскуола аһылларыгар ыраахтан-чугастан ыҥырыылаах ыалдьыттар, үөрэммит, үлэлээбит үгүс дьон, нэһилиэк олохтоохторо, төрөппүттэр кэлбиттэр.


Оскуола аһыллыытын үөрүүтүгэр СӨ Правительствотын бэрэссэдээтэлэ Владимир Солодов сылдьан эҕэрдэлээтэ. 80-90-н ааспыт ытык кырдьаҕастар сылдьан алгыс тылларын эттилэр, эдэрдэр үөрэн-көтөн эҕэрдэлэрин тиэртилэр.

Саҥа оскуолаҕа киириини Игидэй оскуолатын үөрэнээччилэрэ бары долгуйа күүппүппүттэрэ. Оҕолор араас күрэхтэһиилэргэ сылдьан таас оскуолалаахтарга тиийдэхтэринэ ымсыыра саныыллара.

— Айар үлэ суруйтардахтарына таас оскуолаҕа үөрэниэхпин баҕарарбын куруук суруйарым. Ол баҕа санаам дьэ туолла. Кыс хаар ортото кыараҕас, кыра оскуола дьиэтиттэн улахан сырдык таас оскуолаҕа көспүппүт! Сүргэбит көтөҕүллэн библиотекабыт кинигэлэрин субуотунньуктаан таспыппыт. Ыраас, сырдык кабинеттарга наадалаах кыра малларбытын эрэ киллэрбиппит, — диир 11-с кылаас үөрэнээччитэ Коля Марков. — Кылааспыт кабинета салгынныын атын. Билигин миэхэ алта уруок диэн кыра. Наар аҕыстыы эбэтэр тоҕустуу уруокка үөрэниэхпин баҕардым. 

Нэһилиэк ытык кырдьаҕаһа, герой-ийэ Мария Аргунова, оскуолаҕа уһуннук учууталлаабыт, директордаабыт, 94 саастаах Михаил Кузьмин.

Оскуола икки сыл тутуллан үлэҕэ киирдэ. Араас омук дьоно кэлэн үлэлээтилэр.  Оскуола элбэх хостордоох, остолобуойдаах, үөрэнэргэ, сайдарга киэҥ-куоҥ. Киһи эрэ эрчиллиэх физзаллаах, ханна да аралдьыйбакка олорон кинигэ ааҕыах үчүгэй библиотекалаах, актовай зааллаах, араас анал кабинеттардаах.

Ааптар: Николай МАРКОВ 

This post was published on 25.12.2018 14:22 14:22