Игидэй оҕолоро киинэ устан көрдөрдүлэр

П.А.Ойуунускай төрөөбүтэ 125 сылын чэрчитинэн Игидэй кулуубугар бэрт сэргэх тэрээһин ыытылынна. Орто оскуола педагог-библиотекара Г.С. Попова уонна олохтоох модельнай библиотека сэбиэдиссэйэ К.А. Жулева оҥорбут бырайыактарынан оскуола оҕолоро уус-уран киинэ устан, улахан экраҥҥа таһаардылар. 


Игидэйгэ уус-уран киинэни устууга үс тиэмэ бэриллибит. Ол курдук Э.К.Пекарскайга, К.Г.Оросиҥҥа, П.А. Ойуунускайга анаан, кинилэри билиһиннэрэр, эбэтэр Ойуунускай айымньытынан киинэҕэ оонньоон, устан, монтажтаан, афиша оҥорон кыттыы. Биэс кылаас кытынна. Олус кыһаллан үлэлээбиттэр.

Дьүүллүүр сүбэ түмүккэ анал ааттары, миэстэлэри олохтоон, үлэ бары өрүтүн сыаналаан, түмүк таһааран туоһу суруктары, грамоталары туттарда. Тэрээһин иккис чааһыгар педагогическай үлэ бэтэрээнэ Л.В.Андросова олус дириҥ ис хоһоонноох Былатыан Ойуунускай олоҕун, үлэтин, айымньыларын толору сырдаппытын улахан дьон олус сэҥээрдилэр. Кини Платон Алексеевич ийэтигэр анаан суруйбут хоһоонун өйтөн олус иэйиилээхтик аахпыта олус долгутуулаах буолла.

Нэһилиэкпит олоҥхоһуттара олоҥхолоон доллоһуттулар. Көрөөччүлэр ордук С.Е.Оросин, И.М.Заболоцкай олоҥхолообуттарыттан астыммыттарын ытыс тыаһынан биллэрдилэр. Бу тэрээһиҥҥэ «Алаас оһуордара», «Көмүс күһүн» үҥкүү ансаамбыла, «Иэйии» литературнай түмсүү, «Оһуор тойуга» иистэнньэҥнэр түмсүүлэрэ, бэтэрээн ырыаһыттарбыт уонна алын кылаас оҕолорун хомоҕой тыллаах хоһоонньуттара кыттаннар, тэрээһини өссө сиэрин ситэрэн биэрдилэр.

«Таатта үрэх үрдүгэр» ырыаны доргуччу ыллаан, Улуу убайбыт Ойуунускайга сүгүрүйүү, кининэн киэн туттуу бэлиэтин, биир сомоҕо буолан хорунан түмүктэннэ.

Нэһилиэк биир улахан тэрээһининэн оскуола оҕолоругар ыытыллыбыт киинэ куонкурсун түмүгүн таһаарыы буолла. «Бастыҥ киинэ» Грант-при хаһаайыттарынан 5 кылаастар буоллулар. 1 миэстэ — 11 кылаастар, 2 миэстэ — 10 кылаастар, 3 миэстэ — 2 кылаастар, көрөөччү биһирэбилин 5 кылаастар ыллылар. Бастыҥ тэттик оруоллары толордулар Айсаар Ермолаев, Илья Лопатин, Семен Лопатин, Полина Антоева. Оруоллары бастыҥ толорооччу аатын ыллылар Маша Лопатина,11 кылаас, Айгылаан Захаров, 5 кылаас. Рекламаны бастыҥ көрдөрөөччүнэн 11 кылаас коллектива, киинэни бастыҥ устааччынан Уйгулаан Попов, бастыҥ туруорааччынан Дарья Терентьевна Матаннанова буоллулар.

Үүнэр көлүөнэни кэрэ эйгэҕэ уһуйууга үлэлэһэр учууталларга Махтал сурук ананна М.П.Матаннановаҕа, Д.Т.Матаннановаҕа, Л.Н.Захароваҕа, С.С.Дягилевҕа, Р.Н.Кузьминаҕа. Бу туһунан оскуола педагог-библиотекара Гизелла Попова иһгитиннэрэр.

Ааптар: «Таатта» хаһыат

This post was published on 19.11.2018 17:42 17:42