Золотинскайдааҕы балыыһа бырааһа Владимир Наумов көрдөрүнэ кэлбит дьахтары илиигэ охсуолаабытын туһунан интернеккэ тарҕаммыт видео тула ырытыһыы билигин да ааһа илик. Тыа сирин бырааһа үлэтиттэн ууратыллыбытын туһунан эмиэ баар. Ити эрээри Нерюнгри оройуонун уопсастыбаннаһа даҕаны, Иенгра олохтоохторо даҕаны бу быһаарыыны кытта сөпсөспөттөрүн этиннилэр. Бу этинии ыраах нэһилиэнньэлээх пууҥҥа быраас суоҕун эрэ иһин ылыллыбатаҕын тустаахтар бэлиэтииллэр.
Бу күннэргэ Нерюнгрига оройуоннааҕы балыыһа уонна оройуон уопсастыбаннай сэбиэттэрэ кыттыгас мунньахтаатылар. Манна СӨ уопсастыбаннай палаататын чилиэнэ Нэлля Бигеева, Иенгра көхтөөх дьоно, кырдьаҕастар сэбиэттэрин, нэһилиэк дьаһалтатын бэрэстэбиитэллэрэ, олохтоох сэбиэт депутаттара, үөрэх тэрилтэлэрин салайааччылара кыттыыны ыллылар.
Үгүстэр быраас Владимир Наумовы билиилээх, эйэҕэс, хаһан баҕарар ыарыһахха көмөҕө кэлэр исписэлиис быһыытынан ылыналларын этиннилэр. Кинилэр этэллэринэн, Иенгра төрүт олохтооҕо, дьон олоҕор быһаччы туһалаах идэни ылан баран, төрөөбүт дойдутугар кэлэн үлэлии сылдьара ытыктаныахтаах. «Кини идэтинэн үлэтин тохтотуо суохтаах«, — диэтилэр биир дойдулаахтара.
Мустубут дьон видеонан тарҕаммыт информация сымыйатын, тустаах киһини киртитэр эрэ ис хоһооннооҕун, дьиҥ чахчы туох буолбутугар сөп түбэспэтин бэлиэтээтилэр. Маны сэргэ быһылааҥҥа кыттыгастаах дьахталлар нэһилиэккэ соччо бэрдэ суох бэрээдэктээхтэринэн биллэллэрин эттилэр. Иенгра сорох олохтоохторун тылларынан, быраас Наумовтан видеону тарҕатыыга эбэтэр тарҕаппат буолууга харчы көрдөөһүнэ кытта баара.
Мунньах кэмигэр дьон оройуон сэбиэтин депутата Александр Силин видеоны интернеккэ тарҕаппытын кириитикэлээтилэр. Нерюнгри олохтоохторо кини айдааннааҕын, Иенгра олохтоохторун ортолоругар соруйан тиксиһиннэртиир дьайыылары оҥорорун бэлиэтээтилэр.
«Мин саныахпар манна быраас уонна ыарыһах иирсээнэ буолбатах, дьон тус олоҕун конфлига, хомойуох иһин, медицина тэрилтэтин иһигэр салҕаммыт. Владимир Наумов 28 саастаах, эдэр быраас, ити эрээри бэлиэр төрөөбүт дойдутугар ытыктабылынан туһанар. Мин Владимиры чахчы аһынабын. Кини бэйэтин идэтин сөбүлүүрэ, биир дойдулаахтарын таптыыра көстөр. Ону олохтоох кыргыттар сыыһа быһыыларыттан сылтаан, сэлиэнньэ үчүгэй исписэлиистэн матыан сөп. Олохтоох быраабы араҥаччылыыр уоргаттар бу быһылааҥҥа сиэрдээх быһаарыы таһаарыахтара дии саныыбын«, — диэтэ Нэлля Бигеева.
«Мин санаабар бу тус дьон олоҕун иирсээнэ. Ону сиһилии ырыппакка да этиэххэ сөп. Видеону да көрүҥ. Быраас прием кэмигэр ыарыһаҕы кытта икки эрэ буолуохтаахтар. Атын туора киһи суох буолуохтаах. Онтон видеоҕа көрдөххө, элбэх туора киһи баар, тас таҥастарынан сылдьаллар, Наумов бэйэтэ балыыһа үлэһитин курдук көстүбэт. Өскөтүн бу учаастактааҕы балыыһаҕа буолбут диэн быһаарыы суоҕа буоллар, икки киһи ардыларыгар буолбут киирсиһии диэн өйдүөххэ сөп. Саҥалара да ону дакаастыыр«, — диэн СӨ уопсастыбаннай палата доруобуйа харыстабылыгар хамыыһыйатын чилиэнэ Светлана Давыдова санаатын үллэһиннэ.
Санатар эбит буоллахха, Владимир Наумов бэрэбиэркэ бүтэ илигинэ үлэтиттэн тохтуурун туһунан сайабылыанньа суруйбут. Кини аатыгар холуобунай дьыала тэриллибит.
