Саха сиринээҕи ис дьыала министиэристибэтин солбуйааччы – ИДьМ силиэстийэлиир управлениетын начальнига Николай Мамчур кини салалтатынан үлэлиир дьахтары күүһүлүү сатааһыҥҥа уорбаланарын туһунан суруналыыстар биллилэр. Быраабы араҥаччылыыр уорганнар СИА-ҕа эппиттэринэн, билигин миниистири солбуйааччы хоһугар дьэҥдьиир буола турар.
Силиэстийэлиир управление дьиэтигэр миниистири солбуйааччы 24 саастаах эдэр дьахтары күүһүлүү сатаабыт.
«Түүн 12 чаас саҕана Николай Мамчур илиибин эрийэн, күүһүлүү сатаабыта, ыстаанын сулбуруппута. Мин нэһиилэ кинитэн куоппутум», — диэн үлэһит этэр.
Биһиги информациябытынан, Саха сиригэр билигин федеральнай ревизордар кэлэ сылдьаллар, Москва үлэһиттэрэ ис дьыала уорганнарын үлэлэрин былаан быһыытынан бэрэбиэркэлииллэр.
Николай Мамчур силиэстийэлиир управление салайааччытынан 2014 сыл бүтүүтэ анаммыта. Үлэҕэ улахан уопуттаах: силиэдэбэтэлтэн РФ ИДьМ Приволжьетааҕы федеральнай уокурук силиэстийэлиир чааһын начальнигын солбуйааччыга диэри үрдээбитэ.
