29 Кулун тутар 29.03
  • -14°
  • $ 92,26
  • 99,71

Хоту улуустарга эмчиттэр ыарыһахха 25 чааһынан эрэ көмөлөһөр кыахтаахтар

08:55, 24 марта 2016
Текст:
Читайте нас на
Яндекс Новости
ЯДВ

Парламентарий дьахталлар уопсастыбаннай-политическай кулууптарын киэҥ ыҥырыылаах мунньаҕар «Арктика оҕолоро» бырагыраама бырайыагын дьүүллэстилэр.


«Хотугу регионнарга оҕолор 70 бырыһыаннара доруобуйаларын туруга кэһиллиилээх. Балаһыанньаны тупсарар туһугар Уһук Хотугу сиргэ доруобуйа харыстабылын мобильнай тэрилтэтин үлэтин тэрийиэххэ наада. Бу тэрилтэ Арктика уонна хоту оройуоннар ыраах уонна киһи кыайан тиийбэт сирдэригэр көһө сылдьыаҕа», – диэн СӨ Судаарыстыбаннай Мунньаҕын (Ил Түмэн) депутата Жанна Егорова иһитиннэрдэ.

Арктика сиригэр-уотугар доруобуйа харыстабылын салаатын үбүнэн хааччыйыы (сылга биир киһиэхэ суоттааһынынан) биллэ араастаһыылаах. Аҕыйах ахсааннаах төрүт норуоттар олорор оройуоннарыгар быраастар уонна орто сүһүөх эмчиттэр, балыыһалар, амбулаториялар, фельдшерскэй-акушерскай пууннар ахсааннара аҕыйыыр. Оҕо уонна дьахтар доруобуйатыгар сүбэ-ама биэрии тиийбэт. Эмтиир тэрилтэлэр үгүстэрэ олохтоох өрөмүөнү, эминэн уонна аныгы эмтиир тэриллэринэн хааччыйыыны эрэйэллэр.

Үрдүк категориялаах эмчиттэр тырааныспар кыһалҕатыттан уонна нэһилиэктэр ыраах-ыраах сыталларыттан кинилэргэ улахан эрэйинэн тиийэллэр. Суол-иис мөлтөҕүттэн өҥөнү оҥоруу көрдөрүүтэ Саха Өрөспүүбүлүкэтигэр 25 чааска тэҥнэһэр. Ол эбэтэр, ыарыһаҕы эмтиир көмө наада буоллаҕына, быраастар 25 чааһынан эрэ көмөлөһөр кыахтаахтар.

Килиимэт уларыйыытыгар биир кутталлаах бөлөххө оҕолор киирсэллэр: тыынар уорганнара ыалдьар, ол иһигэр ойоҕостотуу элбэх.

«Хотугу сир уонна дойду атын регионнарын оҕолоро тэҥэ суох усулуобуйаҕа олороллор. Тулалыыр эйгэ киртийиититтэн хотугу сир оҕолоро ыарыыны утарсар систиэмэлэрин сайдыыта 2-5 сылынан хаалар. Хас биирдии бэһис оҕо ыйааһына тиийбэт. Үгүс оҕо психиката кэһиллиилээх. «Ыарыйдыҥ-кэллиҥ-эмтэнниҥ» диэн өйдөбүл оннугар «Эһиэхэ кэлэбит-ыарыыны быһаарабыт-эмтиибит» диэн хайысха тутуһуллуохтаах. Ол эбэтэр, мобильнай тэрилтэ ыраах сытар нэһилиэнньэлээх пууннарга тиийиэхтээх, биир эрэ нэдиэлэ буолбакка, олохтоохтук уонна хаачыстыбалаахтык үлэлиэхтээх. Быраастар ыарыыны быһаараат да, тута онно эмтиэхтээхтэр. Ол курдук, биһиги Арктика оҕолорун доруобуйаларын харыстыахпыт, ол аата – Арктиканы барытын харыстыахпыт», – диэн бэлиэтээтэ депутат.

Ол да иһин, өрөспүүбүлүкэ норуодунай депутата Арктика уонна хотугу оройуоннар оҕолорун доруобуйаларын тупсарыыга судаарыстыбаннай уонна регионнааҕы бырагыраамалары ылыы наадатын ыйда.

Арктика уонна хотугу сир 13 улууһугар:

– 22 473 оҕо эмчиттэргэ көрдөрүннэ;

– 1 728 оҕо араас ыарыылаах;

– 1 200 кырачаан быраас өҥөтүгэр аан бастаан наадыйда;

– 178 оҕо диспансернай кэтээн көрүүгэ ылылынна;

​ 749 оҕо – эчэйилээх.

Следите за самым важным и интересным в Telegram-канале и WhatsApp-группе ЯСИА