Саха сирин баһылыгын сорудаҕынан, хорупсуйаны утары сэбиэт быһаарыытынан муниципальнай атыы кииннэнэр. Ити кэлэр сылтан ыла саҕаланар.
«Бырайыак билигин сөбүлэһиини ааһар. Алтынньы 15 күнүгэр өрөспүүбүлүкэ баһылыгын ырытыытыгар киириэҕэ», —диэн СИА-ҕа атыылаһыы эйгэтигэр хантараак систиэмэтин судаарыстыбаннай кэмитиэтин салайааччыта Александр Попов эттэ.
Баһылыкка киирэр бырайыакка сурулларынан, муниципалитеттар атыылаһыыны сүрүннүүр судаарыстыбаннай кэмитиэккэ «баайыллыахтара». Кэмитиэт биэс сыл иһигэр манна бэрээдэги олохтообутун эбэн этэр оруннаах. Бырайыагы оҥорбут дьон этэллэринэн, маннык эрэ буоллаҕына, атыылаһыы дьэҥкэ буолуон сөп.
«Саха сиригэр муниаципальнай 2600 сакаасчыт баар. Балары киинниир туһунан быһаарыы ылылыннаҕына, муниципалитеттар WEB-торги-КС информационнай систиэмэни кытта үлэлиэхтэрэ», —диир Попов.
Электроннай систиэмэ киириэҕиттэн ыла куонкурустар туһунан үҥсүү ахсаана 0,5% диэри намтаабыт. Кэлиҥҥи икки сылга бюджет 1,5 уонна 1,6 млрд солк. кэмчилэммит.
Судаарыстыбаннай кэмитиэт нөҥүө 20 млрд солк. ааһар. Муниципальнай атыыны кииннээһин бырайыага олоххо киирдэҕинэ, биэдэмистибэ хонтуруолугар киирэр үп-харчы кээмэйэ 11,5 млрд солк. эбиллиэ.
