Күһүн буолла, оҕуруот үүнээйитин хомуйуу саҕаланна. Ыаллар ордук хортуоска харайыытыгар ыарахаттары көрсөллөр. Сиэмэ хортуоскатын сааскыга тиэрдибэт түгэннэр тахсалларын туһунан кэпсэччилэр.
Онон хортуосканы харайыы туһунан дьоҥҥо туһалаах буолуо диэн санааттан бэйэм дьаһаныым туһунан суруйарга сананным.
Хортуосканы тэлгэһэҕэ кутан биир-икки хонукка куурдуллар. Ол бириэмэтигэр 0-5 мм фракциялаах цеолиты атыылаһан куурдуллар, онтон дьиэ оҥкучаҕын анныгар целлофан тэлгэтэн баран (оҥкучах буорун сиигэ хортуоскаҕа дьайбатын диэн) цеолиты 10 см халыҥнаах гына кутуллар. Онтон 20-30 см халыҥнах хортуоска, ол үрдүгэр биллэ маҥхайыар диэри цеолит, онтон эмиэ хортуоска 20-30 см халыҥнааҕы, эмиэ цеолит. Итинник оҥкучах туолуор диэри.
Хортуоска оҥкучаҕын температурата 3-5 кыраадыс, муҥутаан 7 кыраадыс сылаас буолуохтааҕын суруйаллар. Ол иһин улахан тымныы түһүөр диэри дьиэ сылааһа дьайбатын диэн хортуосканы халыҥ таҥаһынан сабыллар. Онтон тымныы түһэригэр сабыыны ылан кэбиһиллэр. Саас сылыйыыта хос сабыллар.
Цеолит хортуоскаҕа дьайар сииги, хортуосканы буортулуур микробтары оборорго туһалыыр. Мин маннык харайан, саас хортуоска таһаарыытыгар, холобура, тонна кэриҥэ хортуоскаттан уонча эрэ устуука буорту буолбут хортуосканы булааччыбын.
Цеолит оҥкучах сиигин оборон хортуоска араскыылыырын хойутатар сүдү дьоҕурдаах. Уонча куул хортуосканы харайарга биир куул цеолит сөп буолар.
