Дмитрий Таас аатынан Хорообут орто оскуолатын 1968 с. бүтэрбит үөрэнээччилэр быйыл 50 сылларын бэлиэтииллэр. Кинилэр оскуола ситиһиилээх үөрэнээччилэрдээх кылаастарыттан биирдэстэрэ буолаллар.


Өртөн кэтэһиллибит көрсүһүү олунньу 22 күнүгэр ыытылынна, үөрэнээччилэр сүүрбэччэ буоланр үөрэммит оскуолаларыгар ыалдьыттаатылар, учууталларын, үөрэнээччилэри, педкэлэктииби кытта көрүстүлэр. Бу күн РФ үтүөлээх экономиһа, СӨ норуот хаһаайыстыбатыгар туйгуна Владимир Птицын көҕүлээһининэн «Алгыстаах аартыгынан» кинигэ сүрэхтэниитэ буолла. Сонун кинигэҕэ тас ойуутун Үлэ Албан аата уордьан кавалера, худуоһунньук идэлээх Александра Габышева уруһуйдаабыт. Оскуола устуоруйатын сырдатыыттан саҕалаан кэрэхсэбиллээх ахтыылар, хаартыскалар ааҕааччы болҕомтотун тардаллар.

Көрсүһүү үөрүүлээх тэрээһинин Елена Санникова уонна Александра Сергина иилээн-саҕалаан ыыттылар. Эдэр учууталлар уруоктары ыытан сүргэлэрин көтөхтүлэр. Номнуо 70 саастарыгар чугаһаабыт, ийэбит-аҕабыт кэриэтэ саастаммыт үөрэнээччилэр үөрэ-көтө үөрэммит сылларын ахтан-санаан аастылар. Педагогическай үлэ бэтэрээннэрэ Төхтүртэн Нина Колосова, Полина Скрыбыкина, Хорообуттан Егор, Мария Птицыннар ыалдьыттаатылар.

Оройуон салалтатыттан Павел Сазонов, улуустааҕы үөрэх управлениетын начаалынньыга Ирина Черкашина, үөрэх үлэһиттэрин боропсойууһун бэрэссэдээтэлэ Степан Андреев, киин бибилэтиэкэ дириэктэрэ Елизавета Корнилова, оскуола дириэктэрэ Алексей Оконешников эҕэрдэлээтилэр, бэлиэ наҕадаадалары туттартаатылар. Маннык түмсүүлэр эдэр көлүөнэ оскуоланы бүтэрээччилэргэ холобурга сылдьалларын, кинилэр бачыымнара сылтан сыл салҕанан иһэригэр баҕа санааларын тиэртилэр.

Оскуолаҕа сэмэй бэлэхтэрин ‒ көмпүйүүтэр тиэхиньикэтин бэлэхтээтилэр, быйылгы оскуоланы бүтэрээччигэ кэс тылларын анаатылар. Үөрэнээччилэр ырыаларын-үҥкүүлэрин, хоһооннорун бэлэхтээтилэр.

Улуустааҕы киин бибилэтиэкэ кэлэктиибэ 50 сыллаах үөрэнээччилэр ситиһиилэрин, үлэлэрин-хамнастарын билиһиннэрэр кинигэ быыстапкатын туруордулар.

Бу күн Александра Габышева аатынан ИЗО-ҕа уонна Павел Скрябиҥҥэ черчение биридимиэттэригэр үөрэнээччилэргэ улуустааҕы олимпиадалар ыытылыннылар.

Уруһуйга 11 оскуолаттан 43 үөрэнээччи кытынна. 4‒7 кылааска Гран-при кыайыылаахтарынан Павловскайтан Настя Петрова, Балыктаахтан Маша Неустроева, Тумултан Алина Эверстова, Карина Терентьева, кыайыылаахтарынан 4 кылааска Нелли Гоголева, Ф.Г.Охлопков аатынан Майа оскуолатыттан Дайаана Тобонова, Хаптаҕайтан Маша Атласова, 5 кылааска Хорообуттан Аина Жиркова, Тумултан Юля Белолюбская, Баатараттан Аида Баишева, 6 кылааска Хорообуттан Аделина Жиркова, Маттаттан Нина Халдеева, Төхтүртэн Наташа Максимова, 7 кылааска Тыыллыматтан Катя Осипова, Ф.Г.Охлопков аатынан Майа оскуолатыттан Айна Борисова, В.П.Ларионов аатынан оскуолаттан Майя Бережнева ааттаннылар.

Черчениеҕэ 9 оскуолаттан 33 үөрэнээччи кытынна. Бастакы сылын үөрэтээччилэргэ Төхтүртэн Стас Григорьев, Андрей Атласов, В.П.Ларионов аатынан Майа оскуолатыттан Милена Максимова, Сайаана Бурцева, Хорообуттан Тимир Пинигин, Павловскайтан Наташа Илларионова, иккис сылын үөрэтээччилэргэ Павловскайтан Андрей Николаев, Хорообуттан Алквиад Босиков, Павел Скрябин, Алеша Винокуров, Баатараттан Руфина Афанасьева, Мэлдьэхситтэн Кирилл Алексеев, үһүс сылын үөрэтэр оҕолорго Павловскайтан Дося Иванова, Хорообуттан Василий Саввин, В.П.Ларионов аатынан Майа оскуолатыттан Роберт Баишев, Яна Васильева, Мэлдьэхситтэн Евгения Романова, Айаал Кривогорницын миэстэлэстилэр.

Оскуола киэҥ саалатыгар 1968 с. үөрэнээччилэртэн норуот маастардара Христина Бурнашева, Александра Габышева, Альбина Неустроева, архитектор Федор Шишигин, Хорообут нэһилиэгиттэн маастардар Наталья Босикова, Светлана Громова, Татьяна Тихонова, Павел Скрябин, Наталья Босикова үөрэнээччилэрин быыстапкалара дьон-сэргэ болҕомтотун тарта. Кэрэни кэрэхсээччилэргэ маастар-кылаастар тэрилиннилэр.

Сигэн:

0
0

Хоруй суох