Муома улууһун Хонуутугар Кыайыы 75 сыллаах үбүлүөйүн дьоһуннаахтык көрсөргө бэлэмнэнэллэр. Саха сирин, Россия үрдүнэн ыытыллар аахсыйаларга тэбис-тэҥҥэ кытталлар. «Кэнчээри» дьааһыла-саад «Кыайыы түннүгэр» бэлэм.
Коронавируһунан биллэриллибит хааччахтааһын миэрэлэрин Хонуу олохтоохторо тутуһаллар. «Кэнчээри» дьааһыла-саад бөһүөлэк киинигэр турар. Эрдэ үлэлиир дьон оҕолорун көрөн, суукканы эргиччи тохтоло суох үлэлээбитэ. Билигин тохтобулга турар.
Сэбиэдиссэй Жиркова Надежда Николаевна кэпсииринэн, оҕо тэрилтэтэ дойду үрдүнэн буола турар балаһыанньаны толору өйдүүр. «Сыстыганнаах дьаҥ тарҕамматын туһугар ылыллар миэрэлэри, санитарнай ирдэбиллэри булгуччулаахтык тутуһабыт. Кыайыы 75 сыллаах үбүлүөйдээх тэрээһинигэр эмиэ кыттабыт. «Кыайыы түннүгэ» аахсыйаҕа бэлэммит», — диэн этэр.
Россия үрдүнэн биллэриллибит «Кыайыы түннүгэ» аахсыйаҕа бэлэмнэниигэ кэлэктиип кытынна. Оҕолорго история биир өйтөн-сүрэхтэн сүппэт кэмин кэпсииргэ, үөрэтэргэ олус туһалаах дьаһал буоларын бэлиэтииллэр. Оҕолор дьиэлэригэр олорон түннүгүнэн уһуйааннарын көрүөхтэрэ, төрөппүттэрин кытта 1941 — 1945 сыллардааҕы уоттаах сэрии туһунан кэпсэтиэхтэрэ.
«Кэнчээри» оҕо тэрилтэтэ бэйэтэ эмиэ дириҥ историялаах. Сэрии кэннинээҕи кэмҥэ интернат буолан турбута, онтон 50-с сыллартан дьыссаат тэриллибитэ. Билигин түөрт бөлөххө 80-ча оҕо сылдьар.
