Амма Аччыгыйа аатынан “Кэскил” оҕо кыһата, “Чуораанчык”, “Колокольчик” өрөспүүбүлүкэтээҕи оҕо сурунаалларын эрэдээксийэтэ быйыл аан бастаан уолаттарга уонна аҕаларга аналлаах “Хоһуун” куонкуруһу тэрийэн ыыттылар.
Өрөспүүбүлүкэ араас улууһуттан 20 аҕаны уонна кинилэр уолаттарын түмпүт куонкурус кыайыылаахтарын муус устар 13 күнүгэр Тыа хаһаайыстыбатын уонна ас-үөл бэлиитикэтин министиэристибэтин аактабай саалатыгар чиэстээтилэр.
Тыа сирин уйгутун тутан олорор тыа сирин боростуой ыалын аҕалара уолаттарын үлэ үөрүйэхтэригэр, булка, спорка, сатабылга иитэллэрин видеоролик нөҥүө кэпсээн, көрдөрөн билиһиннэрбиттэрэ.
Тыа хаһаайыстыбатын уонна ас-үөл бэлиитикэтин, Айылҕа харыстабылын, Ыччат уонна дьиэ кэргэн бэлиитикэтин миниистирдэрин солбуйааччылара: Николай Петров, Николай Додохов, Савва Михайлов; “Тыгын оонньууларын” сэттэ төгүллээх кыайыылааҕа Уйбаан Белолюбскай; “Өрөспүүбүлүкэ аҕаларын лигата”, “Урааҥхай” кулууп, “Көмүөл” хампаанньа, “Кынат” төрөппүттэр уопсастыбаннай түмсүүлэрин салайааччылара: Айхал Габышев, Тургун Попов, Борис Павлов, Гаврил Адамов“Хоһуун” кыттааччыларын үлэлэрин көрөн, кыайыылаахтары быһааран, бэйэлэрин анал бириистэрин туттардылар.
Куонкурус ааптара, “Чуораанчык” сурунаал кэрэспэдьиэнэ Вероника Александрова-Эрэлкээнэ: “Биһиги бу куонкуруһу тэрийэрбитигэр аҕа уонна уол оҕо икки ардыгар былыр-былыргыттан олохсуйан кэлбит, олох төрдө-төбөтө буолбут ситими арыйан көрдөрөр сыалы-соругу туруорбуппут. Олохпут тэтимэ наһаа түргэн, оҕолорбутун кытта аргыый-наллаан олорон кэпсэтэрбит да ахсааннаах буолла. Оҕо уонна төрөппүт, ордук аҕа уолун кытта ураты сыһыаныгар болҕомтобутун туһаайарбыт, ону көҕүлүүрбүт билигин ордук суолталаах буолла”, — диэн санаатын үллэһиннэ.
Онтон тыа хаһаайыстыбатын уонна аска-үөлгэ бэлиитикэтин миниистирин солбуйааччы Николай Петров: “Тыа сиригэр оҕолорун батыһыннара сылдьан, булка-аска, үлэҕэ үөрэтэр эдэр аҕалар баалларын көрөммүн олус үөрдүм. “Хоһуун” – кэскиллээх куонкурус. Инникитин элбэх кыттааччылаах буоллун,” – диэн баҕа санаатын тиэртэ.
Тоҕус хайысханан ыытыллыбыт “Хоһуун-2018” кыайыылаахтарынан кимнээх буоллулар?
— “Эр киһи эрэллээх эркин” номинация кыайыылаахтара – Семен, Филипп, Роман Филипповтар (Хатас);
— “Тыа сиригэр уол уонна аҕа Саха сирин уйгутун тутааччылар” – Дьяконов Айхан (Ытык Күөл, Таатта);
— «Уол оҕону спорка уһуйуу – аҕа сүрүн соруга” – Павлов Дьулустаан (Павловскай, Мэҥэ Хаҥалас);
— “Булт абылаҥар уһуйуу” – Софронов Арсений (Эдьигээн);
— “Сатабыл” — Григорьев Айтал (Үрүҥ Күөл, Чурапчы);
— “Ытык аҕа сүбэтэ” – Сыромятников Саша (Кириэс Халдьаайы, Томпо);
— “Эр киһи үс кута чөл буоларыгар” – Кириков Дмитрий (Майа, Мэҥэ Хаҥалас);
— “Дьиэ кэргэн эрэллээх эркинэ – эр киһи” — Бурцев Вова (Кириэс Халдьаайы, Томпо);
— Интэриниэт куоластааһын түмүгүнэн “Көрөөччү биһирэбилэ” — Титов Урсун (Ой, Хаҥалас).
“Хоһуун-2018” бастакы кыайыылаахтара тэрийээччилэртэн уонна дьүүллүүр сүбэттэн саха быһаҕа, “Байанай” маҕаһыынтан, “Урааҥхай” кулуупка сылы эргиччи дьарыктанарга сэртипикээттэри, тутум эргииригэр дьарыктанар анал спортивнай тэрил, планшет, портативнай төлөпүөн иитэр, “Көмүөл” кинигэ кыһатын бородууксуйата курдук ботуччу бириистэри туттулар. Онтон кыттааччы уолаттар Айтал Григорьев, Сайдам Поротов, Дьулустаан Павлов хоһоон ааҕан, флейтаҕа оонньоон, үҥкүүлээн тэрээһини киэргэттилэр.
edersaas.ru саайтка анаан Сардаана МАТВЕЕВА.
