История уонна химия биридимиэттэригэр биир кэлим эксээмэҥҥэ (ЕГЭ) көрдөрүү түмүгэ ааспыт сыллааҕы курдук. Ити туһунан СӨ Үөрэҕи кэтээн көрөр уонна хонтуруоллуур киин иһитиннэрэр.
Саха сиригэр быйыл историяҕа эксээмэни 982 киһи туттарбыт. Итинтэн алын баалы (32 баал) ылбатах киһи ахсаана ааспыт сыллааҕар 2 %-нан аҕыйаабыт. Онон, кутуйах хаамыытынан да буоллар, сыыйа көрдөрүүбүт үрдээн иһэр диэн үөрүөх тустаахпыт. Саамай үрдүк, 90-98 тестовай бааллары 12 кыттааччы ылбыт.
“Эрэгийиэннэр сыыйа үрдүк көрдөрүүгэ чугаһаан эрэллэр. Арассыыйа 63 субъегын үөрэнээччилэрэ бэлэмнээхтэрин көрдөрдүлэр”, — диэн биир кэлим эксээмэн историяҕа матырыйаалын (КИМ) бэлэмниир федеральнай хамыыһыйа салайааччыта Александр Безбородов бэлиэтээбит.
Оттон химияҕа хайдахпытый? Химияҕа эксээмэни 751 киһи туттарбыт. Бэлиэтээн эттэххэ, биһиги өрөспүүбүлүкэбитигэр ордук болҕомтону бу биридимиэккэ уурар эрэйиллэр. Салайааччылар химияҕа эксээмэни туттарааччы ахсаана сыллата эбиллэн иһэр диэн этэллэр. Ити аата, үөрэнээччилэр естественнэй-научнай хайысхаҕа сыһыаннаах идэлэргэ интэриэстэрэ сыыйа улаатан иһэрин итиэннэ былырыҥҥыыга холоотоххо көрдөрүү төһө да тупсубатаҕын иһин, инники диэки сыҕарыйыы баарын туоһулуур диэххэ сөп. Тустаах биридимиэккэ 90-98 баалы 7 киһи ылбыт.
Людмила ПОПОВА, “Саха сирэ” хаһыат, edersaas.ru
Хаартыска: интэриниэттэн.
