От ыйын 24 күнүнээҕи туругунан Хотугулуу-Илиҥҥи федеральнай университет магистратура уонна аспирантура бырагыраамаларыгар 1410 устудьуонтан барыта 2561 сайабылыанньа киирбит. «Юриспруденция» уонна «Экология» салааларыгар саамай элбэх сайаапка киирбит. Бу туһунан СИА иһитиннэрэр.
Магистратураҕа 1264 абитуриентан 2377 сайаапка киирбит. Мантан очно үөрэниигэ – 1905, кэтэхтэн – 384, буккуйа үөрэххэ – 88. Аспирантураҕа 146 устудьуон салгыы үөрэниэн баҕарарын биллэрбит, тутар хамыһыйа 184 сайаапканы туппут. Мантан 168-һа очно үөрэнэр баҕалаах, 16-та кэтэхтэн.
Киин тутар хамыһыйа испэсэлииһэ Петр Кычкин этэринэн, юриспруденция идэтигэр биэс бюджетнай миэстэҕэ 61 киһи сайаапка биэрбит. Биологическай наукаларга (Экологияҕа) биир миэстэҕэ 14 сайаапка киирбит.
Сайаапка ахсаанынан бастакы үс былдьаһыктаах салааларынан үп-экэниэмикэ института (258 сайаапка), математика уонна информатика института (250), педагогическай институт (187 сайаапка) буолтар.
Аспирантураҕа үс бастакы кэккэҕэ естественнай наукалар институттара (38), математика уонна информатика института (24), физико-тиэхиничэскэй институт (22) буолтар.
От ыйын 23 күнүттэн 2020-2021 сыл үөрэх дьылыгар туттарсыы саҕаланна. Тургутууну этэҥҥэ ааһар инниттэн, Университет киин тутар хамыһыйата абитуриеннарга туһаайан, дистанционнай туттарсыы хайдах барарын видеоинструкция көмөтүнэн эрдэттэн үөрэнэллэригэр сүбэлиир.
